Украина президенти Владимир Зеленский 19 март куни АҚШ раҳбари Дональд Трамп билан ўтказилган телефон суҳбати ҳақида Х ижтимоий тармоғида ёзиб, “Бу йил мустаҳкам тинчликка эришиш мумкинлиги”га ишонч билдирди.
Унинг айтишича, Украина ва АҚШ жамоалари “тинчликка эришиш йўлидаги қадамларни мувофиқлаштириш”ни давом эттириш учун яқин кунларда Саудия Арабистонида учрашишга тайёр.
“Мен АҚШ президенти Дональд Трамп билан ижобий, жуда мазмунли ва самимий суҳбат ўтказдим. Унга 11 март куни Жиддада Украина ва Америка жамоалари ишини яхши ва самарали бошлагани учун миннатдорлик билдирдим. Бу жамоалар учрашуви урушни тўхтатиш йўлида сезиларли ёрдам берди. Биз Украина ва АҚШ урушни ҳақиқатан ҳам тўхтатиш ва мустаҳкам тинчликка эришиш учун ҳамкорликда ишлашни давом эттириши кераклиги ҳақида келишиб олдик. Америка билан биргаликда, президент Трамп ва Америка раҳбарлигида бу йил мустаҳкам тинчликка эришиш мумкин, деб ўйлаймиз”, дея ёзади Зеленский.
Зеленскийнинг айтишича, Трамп у билан Путин билан суҳбати тафсилотлари ва муҳокама қилинган асосий масалалар ҳақида фикр алмашган:
“Урушни бутунлай тўхтатиш йўлидаги дастлабки қадамлардан бири энергетика ва бошқа фуқаролик инфратузилмасига зарба беришни тўхтатиш бўлиши мумкин. Мен бу қадамни қўллаб-қувватладим ва Украина уни амалга оширишга тайёрлигини тасдиқладим. Жамоаларимиз бу қадамни Жиддада муҳокама қилишди. Америка томони ҳам фронт чизиғида ҳеч қандай шартларсиз ўт очишни тўхтатишни таклиф қилди ва Украина ҳам бу таклифни қабул қилди. Биз бунинг амалга ошиши учун ишлашда давом этамиз. Бундай қадамлар ўт очишни тўхтатиш даврида кенг қамровли тинчлик битимини тайёрлаш учун имконият яратиш учун зарур, деб ҳисоблаймиз”, дейди Украина президенти.
19 март куни Украина президенти Владимир Зеленский ва АҚШ президенти Дональд Трамп ўртасида телефон орқали суҳбат бўлиб ўтгани, Америка етакчиси бир соатдан ортиқ вақт давом этган мулоқот жуда яхши кечгани ҳақида ёзиб қолдиргани хабар берилганди.
Изоҳ (0)