Жанубий Кореялик актёр Ким Су Хён билан боғлиқ сўнгги можаролар унинг карьерасига ҳам ўз таъсирини кўрсатмоқда. Ўтган ҳафтада актёр бешта йирик брендлар билан шартномаларни қўлдан бой берди.
Жумладан, Prada модалар уйи Ким Су Хён билан ҳамкорликни тўхтатганини расман тасдиқлади:
“Сизларга шуни маълум қиламизки, бугунги масаланинг жиддийлигини ҳисобга олган ҳолда, актёр Ким Су Хён билан шартнома икки томоннинг ўзаро келишуви асосида бекор қилинди. Бу қарор штаб томонидан қабул қилинган”.
Prada бренди билан шартнома муддати ҳали тугамаган эди. Ким Су Хён модалар уйи билан 2024 йилнинг декабрь ойида реклама кампанияси бўйича ҳужжатни имзолаган эди. Prada’нинг баёнотидан бир кун ўтиб, веган косметика бренди бўлган Жанубий Кореянинг машҳур Dinto Cosmetic компанияси ҳам актёр билан ҳамкорликни тугатганини ўзининг ижтимоий тармоқдаги саҳифасида эълон қилди:
“Агентлик Ким Се Рон билан боғлиқ баёнотни тасдиқлаганидан сўнг, биз Ким Су Хён билан реклама шартномасини бекор қилиш учун жиддий сабаблар борлигини аниқладик”.
2025 йил февраль ойида Homeplus компанияси бренднинг 28 йиллигига бағишланган реклама кампаниясининг юзи сифатида қайта Ким Су Хённи ёллаган эди. Бироқ эндиликда компания веб-сайти ва мобил иловасидан актёрнинг барча суратларини ўчириб ташлаган, шунингдек, савдо нуқталаридан актёр тасвири туширилган барча реклама баннерлари ҳам олиб ташланмоқда.
Жанубий Кореянинг машҳур нон маҳсулотлари ишлаб чиқарадиган тармоғи Тоus Les Jours ҳам Ким Су Хён билан ҳамкорликни тугатди. Бренд актёр билан март ойининг охирида тугайдиган шартномани узайтирмасликка қарор қилди. Компаниянинг расмий саҳифаларида эса Ким Су Хён акс этган барча реклама постлари олиб ташланди.
Эслатиб ўтамиз, “Кўз ёшлар маликаси”, “Мен ақлдан озганман, лекин ҳаммаси жойида”, “Продюсерлар” ва бошқа драмалардаги роллари билан танилган жанубий кореялик актёр Ким Су Хён 24 ёшли актриса Ким Се Рон билан муносабатда бўлганликда ва унинг жонига қасд қилишига сабабчи бўлганликда айбланмоқда.
11 март куни Garosero тадқиқот институтининг YouTube каналида видеомурожаат эълон қилинди. Видеода 2025 йил 16 февралда вафот этган актриса Ким Се Роннинг холаси кўрсатма берди. Унинг сўзларига кўра, жияни Ким Се Ро актёр Ким Су Хён билан 15 ёшидан бошлаб 6 йил давомида — 2015 йилнинг кузидан 2021 йилгача учрашиб юрган.
Видеода журналистлар Се Роннинг тириклигида ёзган мактубларини эълон қилди, у ерда актриса ёрдамга муҳтож бўлганида Ким Су Хён билан боғланишга уринган, аммо барчаси беҳуда бўлгани ёритилган. Актриса кўп марта Ким Су Хёндан ёрдам сўрамоқчи бўлган, аммо у алоқага чиқмаган.
Бундан аввал актёр “Голд Медалист” агентлигининг буюртмасига кўра марҳуманинг обрўсига путур етказадиган турли мақолалар эълон қилди, бу эса актрисанинг қадр-қимматини тушириб юборди. Видео эълон қилингач, нафақат Жанубий Кореядаги барча мухлислар, балки хориждаги интернет фойдаланувчилари ҳозирда Ким Су Хённи қаттиқ қораламоқда.
Ҳозирда Ким Су Хён нафақат Се Роннинг ўз жонига қасд қилишига сабабчи бўлганликда, балки бир неча йил аввал ўша пайтда вояга етмаган қиз билан муносабат ўрнатганликда айбланмоқда.
Изоҳ (0)