Janubiy Koreyalik aktyor Kim Su Xyon bilan bog‘liq so‘nggi mojarolar uning karyerasiga ham o‘z ta’sirini ko‘rsatmoqda. O‘tgan haftada aktyor beshta yirik brendlar bilan shartnomalarni qo‘ldan boy berdi.
Jumladan, Prada modalar uyi Kim Su Xyon bilan hamkorlikni to‘xtatganini rasman tasdiqladi:
“Sizlarga shuni ma’lum qilamizki, bugungi masalaning jiddiyligini hisobga olgan holda, aktyor Kim Su Xyon bilan shartnoma ikki tomonning o‘zaro kelishuvi asosida bekor qilindi. Bu qaror shtab tomonidan qabul qilingan”.
Prada brendi bilan shartnoma muddati hali tugamagan edi. Kim Su Xyon modalar uyi bilan 2024-yilning dekabr oyida reklama kampaniyasi bo‘yicha hujjatni imzolagan edi. Prada’ning bayonotidan bir kun o‘tib, vegan kosmetika brendi bo‘lgan Janubiy Koreyaning mashhur Dinto Cosmetic kompaniyasi ham aktyor bilan hamkorlikni tugatganini o‘zining ijtimoiy tarmoqdagi sahifasida e’lon qildi:
“Agentlik Kim Se Ron bilan bog‘liq bayonotni tasdiqlaganidan so‘ng, biz Kim Su Xyon bilan reklama shartnomasini bekor qilish uchun jiddiy sabablar borligini aniqladik”.
2025-yil fevral oyida Homeplus kompaniyasi brendning 28 yilligiga bag‘ishlangan reklama kampaniyasining yuzi sifatida qayta Kim Su Xyonni yollagan edi. Biroq endilikda kompaniya veb-sayti va mobil ilovasidan aktyorning barcha suratlarini o‘chirib tashlagan, shuningdek, savdo nuqtalaridan aktyor tasviri tushirilgan barcha reklama bannerlari ham olib tashlanmoqda.
Janubiy Koreyaning mashhur non mahsulotlari ishlab chiqaradigan tarmog‘i Tous Les Jours ham Kim Su Xyon bilan hamkorlikni tugatdi. Brend aktyor bilan mart oyining oxirida tugaydigan shartnomani uzaytirmaslikka qaror qildi. Kompaniyaning rasmiy sahifalarida esa Kim Su Xyon aks etgan barcha reklama postlari olib tashlandi.
Eslatib o‘tamiz, “Ko‘z yoshlar malikasi”, “Men aqldan ozganman, lekin hammasi joyida”, “Prodyuserlar” va boshqa dramalardagi rollari bilan tanilgan janubiy koreyalik aktyor Kim Su Xyon 24 yoshli aktrisa Kim Se Ron bilan munosabatda bo‘lganlikda va uning joniga qasd qilishiga sababchi bo‘lganlikda ayblanmoqda.
11-mart kuni Garosero tadqiqot institutining YouTube kanalida videomurojaat e’lon qilindi. Videoda 2025-yil 16-fevralda vafot etgan aktrisa Kim Se Ronning xolasi ko‘rsatma berdi. Uning so‘zlariga ko‘ra, jiyani Kim Se Ro aktyor Kim Su Xyon bilan 15 yoshidan boshlab 6 yil davomida — 2015-yilning kuzidan 2021-yilgacha uchrashib yurgan.
Videoda jurnalistlar Se Ronning tirikligida yozgan maktublarini e’lon qildi, u yerda aktrisa yordamga muhtoj bo‘lganida Kim Su Xyon bilan bog‘lanishga uringan, ammo barchasi behuda bo‘lgani yoritilgan. Aktrisa ko‘p marta Kim Su Xyondan yordam so‘ramoqchi bo‘lgan, ammo u aloqaga chiqmagan.
Bundan avval aktyor “Gold Medalist” agentligining buyurtmasiga ko‘ra marhumaning obro‘siga putur yetkazadigan turli maqolalar e’lon qildi, bu esa aktrisaning qadr-qimmatini tushirib yubordi. Video e’lon qilingach, nafaqat Janubiy Koreyadagi barcha muxlislar, balki xorijdagi internet foydalanuvchilari hozirda Kim Su Xyonni qattiq qoralamoqda.
Hozirda Kim Su Xyon nafaqat Se Ronning o‘z joniga qasd qilishiga sababchi bo‘lganlikda, balki bir necha yil avval o‘sha paytda voyaga yetmagan qiz bilan munosabat o‘rnatganlikda ayblanmoqda.
Izoh (0)