Ўзбекистонда хусусий ўқув марказларида хорижий тилларни ўрганадиган ёшларга харажатларининг бир қисми қоплаб берилади. Бу ҳақда 14 февраль куни Шавкат Мирзиёевнинг ёшлар билан мулоқоти давомида маълум қилинди.
Меҳнат бозорига тил биладиган ёшлар кириб келишини рағбатлантириш учун хусусий ўқув марказларида хорижий тилларни ўрганадиган ёшларга харажатлари “2+6” шаклида қоплаб берилади. Бунда ўқув харажатларининг дастлабки 2 ойи ўқувчиларнинг ўз маблағидан, қолган 6 ойи давлат ҳисобидан тўлаб берилади.
Шунингдек, хорижий тиллардан C1 даражасига эга бўлган ёшлар ташаббус кўрсатиб, олис ва чекка ҳудудларда чет тилларига ихтисослашган ўқув марказларини очса, уларга 120 миллион сўмгача фоизсиз ссуда берилади.
Шавкат Мирзиёев 2024 йил февралида ёшлар бандлигини таъминлаш чора-тадбирлари бўйича йиғилиш ўтказганида хусусий курсларда ўқиб, C1 сертификатини олган ёшларга ўқиш харажатлари, немис, француз, корейс, япон ва хитой тиллари бўйича эса B2 даражаси сертификатини олиш харажатлари қоплаб берилиши, нафақат сертификат олишдаги имтиҳон харажати, балки олти ойлик ўқиш пули ҳам тўлаб берилиши маълум қилинганди.
2024 йилнинг июлида “Ёшларни хорижий тилларга ўқитиш тизими самарадорлигини ошириш бўйича қўшимча чора-тадбирлар тўғрисида”ги президент қарори билан айрим ёшларнинг тил ўрганиш бўйича ўқиш харажатларини қоплаш учун бир марталик моддий рағбатлантириш тизими жорий этилди.
Унга кўра, имтиҳон топшириш харажати қопланадиган халқаро имтиҳон тизимлари бўйича инглиз, немис, француз, корейс, хитой ва япон тилларидан камида C1 ёки унга тенглаштирилган мос даражадаги сертификат олган ёшларнинг имтиҳон топшириш харажатларини компенсация қилишга қўшимча равишда ўқиш харажатларини қоплаш учун БҲМнинг 3 баравари миқдорида бир марталик моддий рағбатлантирилади.
2024 йил 1 сентябрдан 2027 йил 1 январгача ёшларнинг немис, француз, корейс, хитой ва япон тиллари бўйича халқаро имтиҳон тизимларида имтиҳон топшириш харажатлари қоплаб берилиши учун улар томонидан тўпланиши лозим бўлган баллнинг (сертификат даражасининг) минимал кўрсаткичи бир поғона пасайтирилди.
Изоҳ (0)