Нега корейс дорамаларини яхши кўрамиз? Чиройли актёрлар, Чосон давридаги ҳашаматли либослар, қизиқарли сюжетлар ва ниҳоят, қаҳрамонларнинг ҳис-туйғуларига алоҳида эътибори учундир балки. Сериал воқеалари бир неча аср олдин содир бўлган тақдирда ҳам, бу биз ҳақимизда ҳикоя қилаётганга ўхшайди.
“Тасодифан учрашдик”, реж. Су Ён Канг (2023)
Машҳур кечки янгиликлар бошловчиси Юн Хе Жун (Ким Донг Вук) сирли воқеаларга аралашиб қолади. Кутилмаганда вақт бўйлаб саёҳат қилиш имконига эга бўлиб, серияли қотилликлар ҳақидаги даҳшатли ҳақиқатни билиш учун 1987 йилга саёҳат қилади. Кўп ўтмай, бош қаҳрамон ўтмиш кўчаларида кезиб юрган ёлғиз ўзи эмаслигини тушунади. Бек Юн Ён (Жин Ки Джу) исмли қиз ёзувчи бўлишни орзу қилади, лекин нашриётдаги ишда кеча-ю кундуз ишлашга мажбур. Ҳозир у бир нарсани хоҳлайди холос — ўтмишда ота-онасининг оила қуришига йўл қўймаслик. Йигит ва қиз учрашишади ва бир-бирларига мақсадларига эришишда ёрдам беришга қарор қилишади.
“Гуллаган ёшлигимиз”, реж. Ли Жонг-Же ва Ким Чен Вук (2023)
Сериал воқеалари Чосон даврида содир бўлади. Ёш зодагон қиз Мин Чже Йининг келажакдаги ҳаёти аниқ: у яхши рафиқа ва она бўлишга тайёргарлик кўрмоқда, лекин айни пайтда у акаси номидан терговчи бўлиб ишлайди. Бир зумда унинг бошига бахтсизликлар ёғилади: тўйдан бир неча кун аввал унинг оила аъзолари шафқатсизларча ўлдирилади ва унинг ўзи қонли жиноятда айбланади. Айбсизлигини исботлаш учун у валиаҳд шаҳзода Ли Хванга ёрдам сўраб мурожаат қилади. Шаҳзода айбдорларни топишга рози бўлади. Тергов давом этар экан, қаҳрамонлар ўртасида ҳис-туйғулар пайдо бўлади. Аммо Мин Чже Йи севгилиси тавқи лаънатга учраганини билмайди.
“Қирмизи юрак”, реж. Ю Ён Ин (2022)
Сериал сюжети Ли Танинг (Ли Жун) тахтга чиқиши билан бошланади. Унинг отаси Сеонгжонг маслаҳатчиси Парк Ке-вон (Жанг Ҳюк) ёрдамида олдинги монархни ағдариб, янги сулолага асос солади. У мутлақ монарх бўлмоқчи, аммо бош вазир Пак Кё Воннинг қаршилигига дуч келади. Тахт учун курашнинг марказида жамиятнинг умумэътироф этган асосларига қарши чиққан зодагон Ю Жунг (Канг Хан-на) бўлади. Улар Ли Та билан ўтмишда яқин муносабатда бўлган, лекин уларнинг ҳис-туйғулари ҳар қандай тўсиқларни енгиб ўтади.
“Қиролича соябони остида”, реж. Ким Хён Шик (2022)
Воқеалар марказида — қирол оиласи туради. Қудратли ва қайсар она қиролича Им Хва Рен (Ким Хе Сук) ўғилларини ҳимоя қилиш учун ҳамма нарсага тайёр. Аммо унинг меросхўрлари жуда беғам. Уларнинг кўнгилхушликлари баъзан қуюшқондан чиқиб, саройда норозиликларга сабаб бўлади. Валиаҳдларни маккор фитналардан ҳимоя қилиш учун бўлажак қиролнинг онаси қийинчиликларга чидаб, душманлари билан курашади.
“Қизил манжет”, реж. Жунг Жи Ин ва Сонг Ёнг Хва (2021-2022)
XVIII аср. Чосон қироллик саройида ўқишни тугатгандан сўнг сарой хоними бўлишга умид қилаётган Док Им (Ли Сэ Ён) исмли етим хизматкор қиз яшайди. Боғда сайр қилаётганда кутилмаган воқеа содир бўлади: қочиб кетган йўлбарс ёш қизларнинг ҳаётига таҳдид солади, аммо зийрак Док Им уларни қандай қутқариш кераклигини тушунади. Унинг ўзини эса валиаҳд шаҳзода Ли Сан (Ли Жун Хо) қутқаради. Хизматкор қизнинг жасоратига қойил қолган ва гўзаллигига мафтун бўлган шаҳзода Деок Имни ўзининг шахсий хизматкорига айлантиради. Бу малика Хваваннинг (Сео Хе-Рим) жаҳлини чиқаради. Шундан сўнг қиз сарой фитнасининг марказида бўлади. Ли Сан эса севги ва бурчдан бирини танлаши керак.
“Қирол марҳамати”, реж. Сон Хён Вук ва Ли Хён Сеок (2021)
Қирол канизаги эгизак фарзандларни дунёга келтирганда, сарой аъёнлари буни ёмонлик аломати деб билишади. Улар ўғил чақалоқни валиаҳд шаҳзода қилиб, қиз чақалоқни ўлдиришга қарор қилишади. Онанинг юраги бунга дош беролмайди — у қизини яширинча қутқаради. Йиллар ўтиб, улғайган қиз Ли Хви (Парк Эун Бин) саройда хизматкор бўлади. Саройда у тасодифан эгизак акаси билан тўқнаш келади. Қиёфаларидаги ўхшашликни пайқаган шаҳзода қизга бир муддат кийимларини алмаштириб кийишни таклиф қилади. Худди шу куни меросхўр шаҳзода ўлдирилади. Энди Ли Хви ўз ҳаётини сақлаб қолиш учун буни сир сақлаши ва валиаҳд шаҳзода ролини ўйнаши керак.
Изоҳ (0)