Алишер Навоий номидаги кино саройида корейс фильмлари фестивали бошланди

Жорий йилнинг 18 ноябрь куни Алишер Навоий номидаги кино саройида «Корея карвони — Марказий Осиё — 2014» тадбирлари доирасида «Корейс фильмлари фестивали – 2014» бошланди. Б ҳақда «Kinopanorama.uz» хабар бермоқда.

Фестиваль таниқли корейс кинорежиссёри  Канг Чже Пюнинг 1950—53 йилларда бўлиб ўтган корейс уруши вақтидаги бир оила тақдирига бағишланган «38-параллель» фильми билан очилди.

Бундан ташқари, ўзбек томошабини кино саройида турли жанрдаги «Ёшликнинг қайноқ қони» (2013, режиссёр Ли Эн У), «Яхши, ёмон, жинни» (2008, режиссёр Ким Чжи Ун), «Мени тут» (2013, режиссёр Хён Чон Ли), «Буюк ошпаз» (2007, режиссёр Жен Юн Су) ва «Янги дунё» (2013, режиссёр Пак Хун Жон) бадиий фильмларини томоша қилиш имконига эга бўлади.

Шу билан бирга, корейс киноси кунлари Фарғона ва Андижон шаҳарларида ҳам 21 ноябрга қадар давом этади.

«Корейс фильмлари фестивали — 2014» ташкилотчиси Корея Республикаси Ташқи ишлар вазирлиги, ҳомийси эса Ўзбекистон Республикаси ҳукуматидир. Тадбирларни ўтказишга ушбу мамлакатнинг Тошкент шаҳридаги элчихонаси кўмаклашмоқда.

Эслатиб ўтамиз, «Корея карвони — Марказий Осиё — 2014» тадбирлари Марказий Осиё минтақасида тўртинчи марта (Қозоғистонда 2012 йил, Қирғизистонда 2013 йил), Ўзбекистонда эса иккинчи марта (2012 йил ва ҳозир) ўтказилмоқда. Унинг мақсади Марказий Осиё мамлакатлари билан Корея Республикаси ўртасидаги кенг кўламли ҳамкорликни ривожлантиришдир.

Қайд этилганидек, киносеансларга кириш бепул.