“Ўзбекистон Республикасининг айрим қонун ҳужжатларига ҳомийлик фаолиятини амалга ошириш тартибини такомиллаштиришга қаратилган ўзгартириш ва қўшимчалар киритиш тўғрисида”ги қонун лойиҳасини жамоатчилик муҳокамаси учун эълон қилинди.
Ушбу қонун лойиҳаси Қонунчилик палатасининг 25 февралдаги мажлисида депутатлар томонидан биринчи ўқишда қабул қилинганди. Мажлисда эҳтиёжманд аҳоли қатламларини ҳар томонлама қўллаб-қувватлаш борасида муайян ишлар амалга оширилаётгани, бу жараёнда нафақат давлат органлари, балки фуқаролар ҳам хайрия, эҳсон ва саховат ишларида ташаббускорлик кўрсатаётгани, лекин амалдаги қонунчиликда ҳомийлик хайрияларини йиғиш тартиби, бу соҳадаги субъектлар фаолиятининг очиқлиги, уларга ажратилган маблағлар сарфланишининг шаффофлиги тизими мукаммал эмаслиги қайд этилганди. Шунингдек, ҳомийлик тўғрисидаги тартиб-қоидаларни бузганлик учун жавобгарлик ҳам белгиланмагани айтилганди.
Эндиликда Маъмурий жавобгарлик тўғрисидаги кодекс 239-2-модда (ҳомийлик тўғрисидаги қонунчилик талабларини бузиш) билан тўлдириш таклиф этилмоқда. Унда ҳомийлик хайрияларини йиғиш тартибини бузиш фуқароларга БҲМнинг 3 бараваридан 5 бараваригача (1 миллион 125 минг сўмдан 1 миллион 875 минг сўмгача), мансабдорларга эса 5 бараваридан 7 бараваригача (1 миллион 875 минг сўмдан 2 миллион 625 минг сўмгача) миқдорда жарима солишга сабаб бўлиши белгиланмоқда.
Қонун лойиҳасида ҳомийликни давлат томонидан қўллаб-қувватлашнинг қўшимча механизмлари, ҳомийлик хайрияларини йиғиш, хайрия қутисини ўрнатиш ва ундан фойдаланиш тартиблари шунингдек, ҳомийлик хайриялари тўғрисидаги ахборотни ошкор этиш ва бу жараённинг очиқлигини таъминлаш шартлари ҳам белгиланмоқда.
Хайрия қутисини ўрнатиш ва ундан фойдаланиш тартибини бузиш, башарти ушбу кодекснинг 188-3-моддасида (тиланчилик қилиш) назарда тутилган ҳуқуқбузарлик аломатлари мавжуд бўлмаса, БҲМнинг 3 бараваридан 5 бараваригача миқдорда жарима солишга сабаб бўлиши кўзда тутилмоқда.
Ҳомийлик ташкилотининг ўз таъминоти (шу жумладан фаолияти билан боғлиқ барча харажатлари) учун молия йилида ўзи сарфлайдиган молиявий маблағларни қонунчиликда белгиланган миқдордан ошириб юборилиши, жиноят аломатлари мавжуд бўлмаган тақдирда мансабдор шахсларга БҲМнинг 3 бараваридан 5 бараваригача миқдорида жарима солишга сабаб бўлиши белгиланмоқда.
Ҳомийлик фаолиятини амалга ошириш тартибини такомиллаштиришга қаратилган қонун лойиҳасининг қабул қилиниши ҳомийлик хайрияларини йиғиш тартибини бузишнинг олдини олиш, ҳомийлик ташкилотлари фаолиятининг шаффофлигини таъминлаш ҳамда уларга нисбатан фуқароларнинг ишончини ортишига хизмат қилади.
Таклиф ва мулоҳазалар 8 мартгача қабул қилинади.
Изоҳ (0)