Бугунги кунда ижтимоий тармоқлар орқали молиявий фойда олиш учун ҳеч кимникига ўхшамас ғоя ва контент яратиш ҳамда уни аудиторияга қизиқарли тарзда етказиб бериш талаб этилади. Қуйида шундай вазифанинг уддасидан чиққан энг сердаромад YouTube-блогерлар рейтингини кўриб чиқамиз.
10-ўрин: Dude Perfect
Америкалик спорт ва комедия гуруҳи Dude Perfect беш нафар иштирокчидан иборат. Улар ўзларининг ажабтовур фокуслари, сеҳрли трюклари ва ўйинлари туфайли машҳур. Уларнинг асосий канали 60,5 миллиондан ортиқ обуначига эга ва каналдаги энг машҳур видео деярли ярим миллиард марта томоша қилинган. Жамоанинг ўтган йилги даромади тахминан 20 миллион долларни ташкил этган.
9-ўрин: Марк Робер
Илм-фан ҳақидаги YouTube канали муаллифи Марк Робер ҳақиқатдан ҳам жуда фойдали контент ярата олган камёб влогерлардан. 44 ёшли ютубер 7 йил давомида НАСАда муҳандис бўлиб ишлаган ва у ерда Марсда машҳур Curiosity ракетасини яратишда иштирок этган. Шундан сўнг Марк Apple’да ишлашга муваффақ бўлди, у ерда блогер виртуал реаллик соҳасидаги патентлар, шунингдек, учувчисиз автомобиллар соҳасида фаолият кўрсатди.
Шу сабабли Марк Робертнинг илмий канали тезда жуда машҳур бўлиб кетди. Ҳозирда унинг 59,3 миллион обуначиси бор ва энг яхши видео 175 миллион марта томоша қилинган. Марк Робер 2024 йилда тахминан 25 миллион доллар ишлаб топгани тахмин қилинмоқда.
8-ўрин: Райан Кадзи
Дунёдаги 8-энг бой ютубер ва ушбу рўйхатдаги биринчи ёш бола Райан Кадзини 38,2 миллион кузатади. Унинг киши Rayan’s World каналига жойлаштирилган видеолар бир неча миллиард томоша қилинган. Райаннинг ота-онаси у бола тўрт ёш бўлганида канални очган.
Ҳозирда у 13 ёшда ва ўтган йили блогернинг даромади 27 миллион долларни ташкил қилган. Кадзининг ўйинчоқлар қутисини очадиган видеоси машҳур бўлгач, унинг онаси асосий ишини — кимё фани ўқитувчилигини ташлаб, блогерлик фаолиятига эътибор беришга қарор қилган.
7-ўрин: Анастасия Радзинская
Like Nastya YouTube канали туфайли 10 ёшар қиз 2021 йилда Forbes рейтингида олтинчи ўринни эгаллаган. Канал ҳозирда 122 миллиондан ортиқ обуначига эга. Бундан ташқари қўшимча яна 11 та канал мавжуд. Қизнинг ота-онаси Юрий ва Анна Радзинскийлар Forbes нашрига қизининг ўсиши учун блог очганликларини маълум қилган.
Настя ҳақидаги блог очилишининг тарихи ажойиб: қизалоқ туғилганида унга мия фалажи ташхиси қўйилган. Шифокорлар бола ҳеч қачон нормал яшай олмаслигини, ҳатто гапира олмаслигини башорат қилишган. Ота-оналар умидсизликка тушмай, бор вақтини қизига бағишлай бошлаган ва икки ёшга келиб қиз меъёрида ривожланаётгани маълум бўлган. Настянинг онаси қизини суратга олишга қарор қилган ва натижани яхшилаш учун актёрлик маҳорати билан ишлай бошлаган. Шу тариқа влог машҳурликка эришган.
6-ўрин: Unspeakable
Каналлар тармоқлари асосчисининг асл исми Натан Гремдир. У 18,1 миллион обуначига эга. Каналларида блогер турли челленжлар уюштиради, Minecraft ва Roblox ўйнайди ва ўз маҳсулотларини реклама қилади. Гремнинг 2024 йилги даромади 28,5 миллион долларни ташкил қилган.
5-ўрин: Rhett and Link
Икки дўст — ҳақиқий исмлари Ретт Маклафлин ва Чарльз Нил бўлган канал муаллифлари яратган видеолар ток-шоу форматида чиқарилади, у ерда йигитлар мулоқот қилишади, ўйнашади, тажрибалар ўтказишади, таомлар татиб кўришади, машҳур меҳмонларни таклиф қилишади ва ҳоказо. Ҳозирда канални 18,9 миллион обуначи кузатади, йигитлар эса 2013 йилда 30 миллион долларга яқин даромад олишган.
4-ўрин: Markiplier
Ҳақиқий исми Марк Эдвард Фишбах бўлган 35 ёшли ютубер компьютер ўйинлари видеолари туфайли машҳур бўлган. Ҳозирда унинг 37,1 миллион обуначиси бор ва унинг энг машҳур видеолари 100 миллиондан ортиқ марта кўрилган. 2024 йилда Markiplier тахминан 38 миллион доллар ишлаб олишга муваффақ бўлган.
3-ўрин: Жейк Пол
Жейк Пол профессионал боксчи бўлиб, у турли машҳур рақиблар билан курашиб (масалан, Тайсон билан жанг қилган), ўз каналига 20 миллиондан ортиқ обуначиларни ва катта реклама имкониятларини жалб қилишга муваффақ бўлган. Унинг ўтган йилги даромади 45 миллион долларни ташкил қилган.
2-ўрин: Дҳар Манн
Дҳар Манн профессионал фильм продюсери бўлиб, унинг Dhar Mann Studios канали 23,4 миллион обуначига эга. Аксарият видеолар ибратли якунланадиган қисқа метражли фильмлар шаклида чиқарилади. Ўртача ҳисобда видеолар 20-30 миллион марта кўрилади. 2023 йилда блогернинг даромади 45 миллион долларга етган.
1-ўрин: MrBeast
Жаноб Бист (Mr. Beast) номи билан танилган YouTube блогери Жимми Дональдсон 1998 йил 7 майда АҚШнинг Шимолий Каролина штати, Гринвил шаҳрида туғилган. У болалигидан видео ўйинлар ва Интернетга қизиқиб келган, бу эса уни 2012 йилда ўзининг YouTube каналини яратишга олиб келди. Канални очганда Жимми атиги 13 ёшда бўлган.
Аввалига Дональдсон турли жанрларда ва мавзуларда видеолар яратишга ҳаракат қилган: блогер видео ўйинлар, турли маҳсулотга тавсиф ва шарҳ берган, шахсий ҳаёти ҳақида влоглар олган. Ҳозирда Жимми нафақат кўнгилочар, балки эзгу ишларга илҳомлантирувчи контент яратишга ҳам эътибор қаратмоқда. У кенг кўламли хайрия тадбирларини уюштиради, мутлақ бегона инсонларга юз минглаб доллар ҳадя қилади, тиббий операцияларни молиялаштиради ва ҳатто уйсизлар учун бошпаналар беради. Жаноб Бист Африканинг бир неча қашшоқ ерларига ташриф буюриб, у ерда сув олиш учун юзта қудуқ қаздирган ва аҳолини ичимлик суви билан таъминлаган.
Изоҳ (0)