АҚШ президенти Дональд Трамп ўзидан олдинги президентлар — Барак Обама ва Жорж Бушларнинг портретларини Оқ уйга ташриф буюрувчилар кўрмайдиган жойга олиб қўйишни буюрди. Бу ҳақда CNN манбаларга асосланиб хабар бермоқда.
Уларнинг маълумотларига кўра, Оқ уйга кираверишда осилган Обаманинг портрети президентнинг шахсий қароргоҳига олиб борувчи асосий зинапоянинг тепасига кўчирилган. Бинонинг бу қисми ташриф буюрувчилар учун бутунлай ёпиқ бўлиб, унга фақат президент оиласи аъзолари, Махфий хизмат ходимлари ва Оқ уй аппаратининг чекланган доирадаги ходимлари кира олади. Худди шу тарзда катта Жорж Буш ва кичик Жорж Бушнинг портретлари ҳам кўчирилган.
Таъкидланишича, бундай қадам Трамп ва Обама ўртасидаги узоқ вақтдан бери давом этаётган кескин муносабатларни яна бир бор кўрсатмоқда. Амалдаги президент яқинда Обамани давлатга хиёнатда айблаган ва унинг маъмурияти Россиянинг АҚШ сайловларига аралашуви ҳақидаги разведка маълумотларини тўқиб чиқарганини даъво қилган эди. Шунингдек, материалда Трампнинг Бушлар оиласи билан ҳам узоқ муддатли келишмовчиликлари борлиги айтилган. Кичик Жорж Буш рафиқаси билан Трампнинг инаугурациясида иштирок этган, бироқ кейинги расмий тадбирларга қатнашмаган.
CNN суҳбатдошларининг қўшимча қилишича, Трамп Оқ уй интереридаги барча ўзгаришларни, ҳатто майда деталларни ҳам шахсан назорат қилади. Обаманинг портрети аллақачон ўзгартирилган. У Катта фоенинг бир бурчагидан бошқасига кўчирилган ва Пенсилвания штатининг Батлер шаҳрида бўлиб ўтган сайловолди митингида Трампга суиқасд қилишга уриниш тасвирланган расм билан алмаштирилган.
Оқ уй протоколига кўра, сўнгги президентларнинг портретлари расмий тадбирлар пайтида меҳмонлар ва сайёҳлар кўриши учун кираверишда кўзга ташланадиган жойларга жойлаштирилиши лозим.
Изоҳ (0)