Англияда шифокорлар 14 ёшли қизнинг ошқозонидан “қовун ҳажмидаги” соч тўпламини олиб ташлади. Бу ҳақда LADBible хабар бермоқда.
Маълум қилинишича, 14 ёшли Эрин Коллинснинг ошқозонидан трихобезоар — диаметри 21 сантиметрдан ортиқ бўлган зич соч тўпламини олиб ташлаш учун мураккаб жарроҳлик амали ўтказилган. Бу ҳосила қизда кучли оғриқ, камқонлик ва овқатланиш муаммоларини келтириб чиқарган.
Таъкидланишича, ўқувчининг қорин оғриғидан илк шикоятлари 2024 йилнинг ноябрь ойида пайдо бўлган. Унинг онаси, 48 ёшли Жоди Коллинс, буни овқат ҳазм қила олмаслик ёки ҳайз даври билан боғлиқ бўлиши мумкин деб тахмин қилган. Бироқ текширувларда ҳеч қандай касаллик аниқланмаган ва май ойигача, оғриқлар кучайгунга қадар, вазият ноаниқ бўлиб қолаверган.
“Эрин олти ой давомида жуда кучли ошқозон спазмларидан азият чекди. Мен буни овқат ҳазм қила олмаслик билан боғладим, унда лактоза ёки глютинни кўтара олмаслик бўлиши мумкин деб ўйладим”, дейди Жоди.
Эрин шифохонага қайта ётқизилганда, шифокорлар ошқозонда сочдан иборат зич массани аниқлашган.
Шифокорларнинг айтишича, бу тўплам бир неча йил давомида шаклланиб, Эриннинг ошқозонини меъёрдан уч баравар катталаштирган бўлиши мумкин. Қизча зудлик билан Бристол болалар шифохонасига етказилган, у ерда жарроҳлар ҳосилани тўлиқ олиб ташлаш учун беш соат вақт сарфлаган.
Мутахассисларнинг фикрича, ўсмир қиз уйқусида беихтиёр ўз сочларини ютиб юборган бўлиши мумкин. Онасининг эътироф этишича, қизи болалигидан сочини ўйнашни яхши кўрган, аммо уни ҳеч қачон еганини кўрмаган.
Жарроҳлик амалиётидан сўнг Эринга витамин ва минераллар курси буюрилди. Шунингдек, вазият такрорланмаслиги учун эса унга уйқу пайтида кийиш учун ҳимоя қалпоғи сотиб олинган.
Изоҳ (0)