Эндиликда жисмоний шахслар фақат ўзи ёки яқин қариндоши манфаати учун хайрия йиғиши мумкин бўлади

Қонунчилик палатаси йиғилишида ҳомийлик фаолиятини амалга ошириш тартибини такомиллаштиришга қаратилган қонун лойиҳаси кўриб чиқилди.

Қонун лойиҳасида ҳомийлик ташкилотлари, яъни ННТ, шунингдек, ҳомийликни амалга оширувчи ва ҳомийлик олувчи юридик шахслар томонидан хайрияларни нақд, нақдсиз ва мол-мулк шаклида йиғишнинг аниқ тартиби белгиланмоқда.

Хайриялар агар нақд пул шаклида йиғиладиган бўлса, буни фақат хайрия қутиси ёрдамида ёки ҳомийлик ташкилотлари, ҳомийликни амалга оширувчи ёки олувчи юридик шахсларнинг банк ҳисобварақларига пул ўтказиш йўли билан амалга ошириш лозим бўлади. 

Агарда хайриялар мол-мулк шаклида йиғилса, қабул қилиб олинган мол-мулк рўйхати шакллантирилади ҳамда унинг тури, миқдори кўрсатилган ҳолда далолатнома тузилади.  

Хайрияларни йиғиш очиқ ва шаффоф ўтади. Бунинг учун жараёнлар бошланиши ва якуни бўйича маълумотлар ОАВ, расмий веб-сайтлар ёки ижтимоий тармоқлардаги саҳифаларда эълон қилиниб, солиқ ҳисоботларида акс эттирилиши зарур бўлади. 

Қонунда фуқаролар, шу жумладан кўнгиллилар томонидан ҳомийлик хайрияларини йиғишнинг ҳам аниқ тартиби белгиланмоқда.

Бунда жисмоний шахслар фақат ўзи ёки яқин қариндоши манфаатида хайрия йиғиши мумкин бўлади. Кўнгиллилар ўзига бегона бўлган шахслар учун хайрия йиғишда фақат эълон бериш билан кўмаклашиши мумкин. 

Таъкидланишича, хайрия қутиси нодавлат ташкилотлар ва бошқа ҳомийлик қилувчи ёки олувчи юридик шахслар томонидан ўрнатилади. Хайрия қутиси шаффоф идиш бўлади ва қути жойлаштириладиган манзил олдиндан эълон қилинади. Уни очишда гувоҳлар иштирок этади ва бу жараён видеотасвирга олиниб, жамоатчиликка эълон қилинади.

Ҳомийлик тўғрисидаги қонунчилик талабларини бузганлик учун маъмурий жавобгарлик белгиланмоқда. 
Қайд этилишича, ушбу қонунга эҳтиёж хайрияларни йиғиш тартибининг қонунчиликда аниқ белгиланмаганлиги сабабли айрим ғараз ниятли шахслар фуқаролар ишончига кириб, пул маблағлари ва мол-мулкини асоссиз қўлга киритиш ҳолатлари кўп учраётганидан юзага келган. 

Аввалроқ хайрия пластик картасига йиғилган пулларни ўғирлаган фуқароларнинг жавобгарликка тортилгани билан боғлиқ бир қатор ҳолатлар аниқланганди.