Жорий йил 1 августда мамлакатдаги корхона ва ташкилотлар сони ўтган йил мос давридагидан 1 минг 112 тага кўпайди. Бу ҳақда Статистика қўмитаси хабар берди.
2025 йил 1 август ҳолатига кўра, Ўзбекистонда 462,2 мингта корхона ва ташкилотлар фаолият кўрсатяпти (2024 йил мос даврида 461,1 мингта). Шундан қарийб 392,4 мингтаси (84,9 фоиз) кичик корхона ва микрофирмалар ҳиссасига тўғри келади.
Ҳудудлар бўйича энг кўп фаолият кўрсатаётган корхона ва ташкилотлар Тошкент шаҳрида — 104,2 мингта. Энг паст кўрсаткич Сирдарё вилоятида — 11 минг 853 та.
Савдо тармоғининг жами корхоналар сонидаги улуши энг юқори бўлиб, умумий ҳисобда 32,6 фоизни ташкил этган. Иккинчи ўринни саноат (12,7 фоиз), учинчи ўринни қишлоқ, ўрмон ва балиқчилик хўжалиги (7,4 фоиз) банд қилган.
Мамлакатда фаолият юритаётган 396,4 мингта тижорат ташкилотларидан 306,2 мингтаси (77,3 фоиз) масъулияти чекланган жамиятлар ҳисобланади.
Чет эл инвестициялари иштирокида фаолият кўрсатаётган корхоналар сони 16 минг 609 та (2024 йил мос даврига нисбатан 2 минг 343 тага ошган). Шундан 4 минг 94 таси қўшма, 12 минг 515 таси хорижий корхоналар.
Ўзбекистонда бизнес юритаётган энг кўп хориж корхоналари Хитойга (4 250 та) қарашли.
Изоҳ (0)