Дўстлар ва қариндошлар билан кўришганда, одатда, уларнинг фарзандларини кўтариб, қучоқлашга ва меҳр беришга шошамиз. Бундай ҳаракат чақалоқ билан ҳиссий алоқа ўрнатишга ёрдам беришига ишонамиз. Аммо шифокорлар огоҳлантиради: ҳеч қачон кўчада ва ювилмаган қўллар билан чақалоқни қучоқлаш ва ҳатто тегиш мумкин эмас. Вояга етган шахслар организми жиддий оқибатларсиз бардош бера оладиган кўплаб вируслар ёш болалар саломатлиги учун ўта хавфли бўлиши мумкин.
Британия миллий соғлиқни сақлаш маркази барча ота-оналарга огоҳлантириш берди. Агар ўзингизда бирор касалликнинг бошланиш аломатларини сезсангиз, чақалоғингизни ўпиш ва қучоқлашдан тийилинг. Ўзингизни мутлақо соғлом деб ҳисобласангиз ҳам, бу ишни уйдан ташқарида қилмаслик лозим. Фарзандингизни қўлга олишдан аввал оддий гигиенага эътибор бериш — қўлларни яхшилаб ювиш керак.
Бундай огоҳлантириш берилишига Британияда бўлиб ўтган нохуш воқеа сабаб бўлган: икки ёшли Жуван исмли болакай оилавий дўсти уни ўпганидан кейин бир кўзидан айрилган. Ота-онанинг айтишича, бола тўсатдан ўзини ёмон ҳис қилган ва умумий вирус юқиш аломатлари пайдо бўлган. Улар шифокорга мурожаат қилган ва болага антибиотиклар курси буюрилган. Аммо дорилар Жуванга ёрдам бермаган.
“Икки кундан кейин биз унинг кўзида жиддий муаммо борлигини пайқадик ва қайта мутахассисга мурожаат қилдик. Ана шундан кейин Жуванда герпес вируси борлиги маълум бўлди”, деди боланинг онаси.
Болада герпес аниқлангач, ота-она дарҳол қон таҳлили топширди, аммо уларда ҳеч қандай вирус аниқланмади. Сўнг герпеснинг хавфли турини бола юқтириб олгани маълум бўлди.
Уларни олдинда яна бир қатор тиббий муолажалар кутиб турибди. Жуванга ташхис қўйилган вақтда касаллик жуда тез ривожланган эди. Герпес кўзнинг шоҳ пардасини шунчалик шикастлаган эдики, у сезувчанлигини йўқотган ва бутунлай кўрмай қолган. Эндиликда шифокорлар боланинг кўриш қобилиятини қайтариш учун курашмоқда.
Жуваннинг ота-онаси бошқа барча ёш болали оилаларни хабардор қилиш учун фаол ташвиқот ишларини олиб бормоқда.
Изоҳ (0)