Куз ва қиш мавсумида ёш болаларда ларингит, ўткир йўтал ва грипп касалликлари каби мавсумий касалликлар туркумидаги ўткир респиратор вирусли инфекциялар сони ортиб боради. Айниқса, қишнинг қаҳратонида мактабгача ва мактаб ёшидаги болалар юқумли касалликларга чалинишга мойил бўлади. Қуйида ана шундай хасталикларнинг тарқалишини камайтирадиган ва фарзандларимиз иммунитетини мустаҳкамлайдиган оддий усуллар ҳақида маълумот берамиз.
Аввало, ўсиб бораётган организм соғлом овқатланиши, боланинг рациони турли хил ва балансли озиқ-овқатлардан иборат бўлиши керак. Кундалик таомномада янги узилган сабзавотлар, мевалар (C витаминига бой цитрус мевалари, киви, қулупнай), оқсилли овқатлар (гўшт, балиқ, дуккаклилар), фойдали ёғлар (ёнғоқ, авокадо, балиқ, тухум) бўлиши зарур. Улар организмни зарур витаминлар ва минераллар билан таъминлайди.
Болаларнинг кундалик режимга амал қилиши ҳам муҳим, улар кунига 10-12 соат ухлаши, ўз вақтида кундузги уйқуга ётиши лозим. Кундалик фаолияти тартибга солинмаган ва кам ухлайдиган болаларнинг иммунитети заифроқ бўлади ва инфекцияларга чалиниш мойиллиги ортади. Шунингдек, тоза ҳавода сайр қилиш, фаол ўйинлар ва спорт билан шуғулланиш каби мунтазам жисмоний фаоллик ҳам иммун тизимини мустаҳкамлайди.
Фарзандингизга гигиена қоидаларини ўргатиш, доимо қўлларни совун билан ювиш, кир қўллар билан юз, бурун, оғиз ва кўз соҳасига тегмасликни уқтириш лозим. Оила аъзоларининг барчасида ўзининг шахсий сочиғи ва бошқа гигиеник воситалари алоҳида бўлиши зарур.
Уйдаги ва болалар вақт ўтказадиган ҳар қандай хонадаги ҳавони мунтазам шамоллатиш керак. Айниқса, яқин ҳудудда бирор юқумли касаллик эпидемияси эълон қилинган бўлса, хоналарга тоза ҳаво оқими киришини таъминлаш муҳимдир.
Педиатрлар тавсиясига кўра, эмлаш бир қатор хавфли инфекциялардан ҳимоя қилади ва касалликнинг жиддий асоратлар билан ўтишига йўл қўймайди. Шунингдек, танани чиниқтириш ҳам иммунитетни мустаҳкамлайди ва организмнинг совуққа чидамлилигини оширади.
Юқумли касалликлар авж олган мавсумда касалланган одамлардан масофа сақлаш, агар оилада кимдир касал бўлса, бемор ва ёш болалар ўртасидаги алоқани чеклаш зарур. Куз-қиш мавсумида жамоат транспорти, болалар ўйингоҳлари ва одамлар гавжум бўладиган бошқа жойларга бормаслик лозим.
Тиббиёт мутахассислари ёшлар ҳам, катталар ҳам бирдек кўпроқ суюқлик ичиши кераклигини таъкидлайди, чунки организмдаги сув баланси жуда муҳим.
Уй, боғча ёки мактабдаги стрессли муҳит ва умуман салбий ҳислар боланинг иммунитетини заифлаштиради, шу сабабли фарзандлар учун ёқимли ҳиссий муҳит яратиш, улар билан кўпроқ вақт ўтказиш, биргаликда ўйнаш ва ижодий қобилиятларини ривожлантириш муҳим.
Шифокорлар болаларга педиатр назорати остида D витаминини қабул қилишни тавсия қилади. Ушбу инфекцияларга қарши курашишда ёрдам берадиган витамин бола туғилганидан кейин биринчи ҳафталарда томчи кўринишида профилактика учун берилади.
Юқорида қайд этилган оддий, аммо самарали чоралар болалар иммунитетини мустаҳкамлашга ва юқумли касалликларни тезроқ енгишга кўмак беради.
Изоҳ (0)