Do‘stlar va qarindoshlar bilan ko‘rishganda, odatda, ularning farzandlarini ko‘tarib, quchoqlashga va mehr berishga shoshamiz. Bunday harakat chaqaloq bilan hissiy aloqa o‘rnatishga yordam berishiga ishonamiz. Ammo shifokorlar ogohlantiradi: hech qachon ko‘chada va yuvilmagan qo‘llar bilan chaqaloqni quchoqlash va hatto tegish mumkin emas. Voyaga yetgan shaxslar organizmi jiddiy oqibatlarsiz bardosh bera oladigan ko‘plab viruslar yosh bolalar salomatligi uchun o‘ta xavfli bo‘lishi mumkin.
Britaniya milliy sog‘liqni saqlash markazi barcha ota-onalarga ogohlantirish berdi. Agar o‘zingizda biror kasallikning boshlanish alomatlarini sezsangiz, chaqalog‘ingizni o‘pish va quchoqlashdan tiyiling. O‘zingizni mutlaqo sog‘lom deb hisoblasangiz ham, bu ishni uydan tashqarida qilmaslik lozim. Farzandingizni qo‘lga olishdan avval oddiy gigiyenaga e’tibor berish — qo‘llarni yaxshilab yuvish kerak.
Bunday ogohlantirish berilishiga Britaniyada bo‘lib o‘tgan noxush voqea sabab bo‘lgan: ikki yoshli Juvan ismli bolakay oilaviy do‘sti uni o‘pganidan keyin bir ko‘zidan ayrilgan. Ota-onaning aytishicha, bola to‘satdan o‘zini yomon his qilgan va umumiy virus yuqish alomatlari paydo bo‘lgan. Ular shifokorga murojaat qilgan va bolaga antibiotiklar kursi buyurilgan. Ammo dorilar Juvanga yordam bermagan.
“Ikki kundan keyin biz uning ko‘zida jiddiy muammo borligini payqadik va qayta mutaxassisga murojaat qildik. Ana shundan keyin Juvanda gerpes virusi borligi ma’lum bo‘ldi”, dedi bolaning onasi.
Bolada gerpes aniqlangach, ota-ona darhol qon tahlili topshirdi, ammo ularda hech qanday virus aniqlanmadi. So‘ng gerpesning xavfli turini bola yuqtirib olgani ma’lum bo‘ldi.
Ularni oldinda yana bir qator tibbiy muolajalar kutib turibdi. Juvanga tashxis qo‘yilgan vaqtda kasallik juda tez rivojlangan edi. Gerpes ko‘zning shoh pardasini shunchalik shikastlagan ediki, u sezuvchanligini yo‘qotgan va butunlay ko‘rmay qolgan. Endilikda shifokorlar bolaning ko‘rish qobiliyatini qaytarish uchun kurashmoqda.
Juvanning ota-onasi boshqa barcha yosh bolali oilalarni xabardor qilish uchun faol tashviqot ishlarini olib bormoqda.
Izoh (0)