Ҳомиладорлик ҳар бир бўлажак онанинг ҳаяжонли ва гўзал даври бўлиши билан бирга, энг ҳимоясиз вақти ҳамдир. Бу даврда ўзингиз ва туғилажак фарзандингизни турли инфекциялардан ҳимоя қилиш муҳим. Юқумли касалликларга чалиниш хавфини камайтириш ва ҳомиладорликни қийинчиликсиз ўтказиш учун оддий, аммо самарали усуллардан фойдаланиш мумкин.
Бунинг учун:
Гигиена қоидаларига риоя қилинг
Тозалик ва покликка эътиборли бўлиш ҳомиладорлик пайтида зарарли инфекцияларни юқтириб олишдан сақлайди. Овқатланишдан ёки таом тайёрлашдан аввал қўлингизни совун билан ювинг, ҳайвонлар билан мулоқот қилгач ҳам антибактериал воситалардан фойдаланинг.
Турли микробларнинг тарқалиш хавфини камайтириш учун сочиқ, тиш чўткаси ва идиш-товоқ каби шахсий буюмларингизни алоҳида сақланг.
Эмланинг
Вакцинация ҳомиладорлик даврида баъзи инфекциялардан ҳимоя қилишга ёрдам беради. Масалан, гриппга қарши, дифтерия, қоқшол ва кўкйўталдан ҳимоя қилувчи Пента (аввалги АКДС) вакциналарини олишингиз мумкин.
Ҳомиладорлик пайтида қайси вакциналар хавфсиз ва зарур эканлиги бўйича шифокорингиз билан маслаҳатлашинг.
Тўғри овқатланиш қоидаларига риоя этинг
Бу даврда тўғри овқатланиш ҳомиладорлик жараёнининг меъёрда кечиши, ҳомиланинг тўғри ўсиши ва ривожланиши учун аҳамиятлидир. Мустаҳкам иммун тизими учун витамин ва минералларга бой мева, сабзавотлар, дуккаклилар, балиқ ва сут маҳсулотларини истеъмол қилиш керак.
Хом ёки яхши пишмаган таомлардан сақланинг.
Хом ва чала пиширилган гўшт, парранда, денгиз маҳсулотлари ва тухум каби озиқ-овқатларда салмонелла, листериа ва ичак таёқчаси каби зарарли бактериялар бўлиши мумкин. Озиқ-овқат орқали юқадиган касалликлар хавфини камайтириш учун барча гўшт маҳсулотлари ва тухумнинг яхшилаб пиширилганига ишонч ҳосил қилинг ва пастеризация қилинмаган сут ичишдан тийилинг.
Жисмоний фаол бўлишни унутманг
Мунтазам жисмоний фаоллик иммунитетни мустаҳкамлашга ёрдам беради ва ҳомиладорлик пайтида касаллик юқиш хавфини камайтиради. Юриш, сузиш ёки ёга каби енгил турдаги жисмоний машқлар ҳомиладорлар учун айни муддаодир. Бироқ турли шикастланиш ва жароҳатга олиб келадиган оғир спорт тури ва жисмоний ҳаракатлардан сақланиш лозим.
Юқоридаги оддий, аммо муҳим маслаҳатларга риоя этиш орқали ҳомиладорлик даврида инфекциялардан ҳимояланиш ва туғилажак фарзандингиз саломатлигини таъминлашга ҳисса қўшасиз.
Изоҳ (0)