Кўксарой қароргоҳида 7 март куни Шавкат Мирзиёев иштирокида 8 март — Халқаро хотин-қизлар куни муносабати билан тантанали маросим бўлиб ўтди. Президент матбуот хизмати давлат раҳбарининг тантанали маросимдаги нутқини эълон қилди.
“Кўпмиллатли бутун юртимиз аёлларини 8 март – Халқаро хотин-қизлар байрами билан чин қалбимдан самимий муборакбод этаман. Мутафаккир бобомиз Алишер Навоий буюк она сиймоси, мўтабар аёл зотини улуғлаб, уларнинг бахт-саодати йўлида барчамизни фидокор бўлишга даъват этгани албатта бежиз эмас.
Чиндан ҳам, меҳр-оқибат, олижаноблик, муҳаббат ва садоқат каби юксак инсоний қадриятларни камол топтиришда, оила қўрғонини мустаҳкамлашда сизларнинг хизматингизни ҳеч нарса билан қиёслаб бўлмайди.
Бугунги қутлуғ байрамнинг файзли Рамазон ойида бўлиб ўтаётгани унинг эзгу руҳи ва мазмунини янада оширмоқда. Муқаддас динимиз ҳам муҳтарама оналаримиз, дилбар опа-сингилларимиз, мунис қизларимизга ҳамиша яхшилик қилишга, уларнинг иззат-ҳурматини жойига қўйишга буюради. Мана шундай қувончли айёмлар барчангизга муборак бўлсин”, деди президент ўз нутқида.
Давлат раҳбари бугунги кунда аёллар турли соҳа ва тармоқларда Ўзбекистон тараққиёти учун муносиб ҳисса қўшаётганини миннатдорлик билан эътироф этди. Масалан, 2017 йилда бошқарув соҳасида ходимларнинг 20 фоизини хотин-қизлар ташкил этган бўлса, ҳозирги вақтда бу рақам 35 фоизга етди. Олий Мажлис Қонунчилик палатаси депутатларининг 38 фоизини, Сенат аъзоларининг 27 фоизини аёллар ташкил этмоқда.
“Аёлларнинг давлат бошқаруви ва парламент фаолиятидаги иштироки кучайгани жамиятимиз ривожига ҳам ижобий таъсир этаётганини ҳаётнинг ўзи кўрсатмоқда. Энг муҳими, ақл-заковатли, билимли ва истеъдодли хотин-қизларимиз давлат ва жамиятнинг барча соҳаларида намуна бўлишмоқда”, дейди президент.
Ўтган йили Олимпия ва Паралимпия ўйинларида мамлакат делегацияси таркибидаги аёл спортчилардан 3 нафари олтин, 8 нафари кумуш, 3 нафари бронза медалини қўлга киритгани Ўзбекистон тарихида илгари бўлмаган натижа эканлигини қайд этди. Қизлар маданият ва санъат соҳасида ҳам Ўзбекистон байроғини баланд кўтараётганини билдирди. Ўтган йили маданият ва санъат соҳасидаги нуфузли халқаро танловларда 25 нафар, мамлакат миқёсидаги кўрик-танловларда эса 71 нафар истеъдодли қизлар ғолиб бўлгани шундан далолат беришини таъкидлади.
“Мана шундай аёлларимиз сафи кенгайиши, қизларимиз бунёдкор авлод бўлиб майдонга чиқиши учун келгусида уларга қўшимча шароитлар яратиб берамиз”, деди президент.
Аёллари ўқимишли ва касб-ҳунарли бўлган юртда тинчлик ва тараққиёт бўлишини, аёллари маърифатли бўлган халқ албатта бахтли бўлишини айтди. Шавкат Мирзиёев ўзига катта ижтимоий масъулият олган ишбилармон хотин-қизларни “Янги Ўзбекистоннинг бунёдкор аёллари” деб атади ва уларга чуқур миннатдорлик билдирди.
“Уларга қандай қўшимча шароит ва енгилликлар керак бўлса, яратиб беришга тайёрман”, деди президент.
“Бир ҳақиқатни барчамиз яхши тушуниб олишимиз зарур. Аёлларнинг ташвиш ва машаққати ҳам, зиммасидаги масъулияти ҳам эркакларга нисбатан анча юқори. Уй-рўзғор ишлари ва фарзанд тарбиясидан ортиб, таълим олаётган, меҳнат қилаётган ва тадбиркорлик билан шуғулланаётган хотин-қизлар замонамизнинг ҳақиқий қаҳрамонлари, десак, тўғри бўлади”, деди президент.
Давлат раҳбари Янги Ўзбекистонда хотин-қизларнинг оғирини енгил қилиш, улар учун барча соҳаларда зарур шароитларни яратиб бериш доимо давлат сиёсатининг энг устувор йўналишларидан бири бўлиб қолишини айтди.
Шавкат Мирзиёев барча аёлларга сиҳат-саломатлик, хонадонларига тинчлик-омонлик, дунёдаги энг катта бойлик – оилавий бахт-саодат ёр бўлишини тилади. Ватаннинг янги юксалиш даврини барпо этишда аёллар доимо олдинги сафда бўлишига ишонч билдирди.
Изоҳ (0)