Айше Барим иши бўйича тергов ҳаракатлари давом этмоқда ва гувоҳ сифатида иштирок этганларнинг барчаси ҳамон ҳуқуқ-тартибот идоралари ходимларининг диққат марказида. Жумладан, ёлғон гувоҳлик беришда айбланаётган Ҳалит Эргенч турк шоу-бизнесининг “қора рўйхати”га тушиб қолган.
Аслида нима бўлган эди?
Айше Барим 2013 йилда Истанбулдаги Гези боғида ҳукуматни ағдаришга қаратилган норозилик намойишларини уюштирганликда айбланиб, жорий йил 27 январь куни ҳибсга олинди. Турк ОАВ қайд этишича, Барим 12 йил аввалги ноқонуний ҳаракатларда иштирок этгани учун умрбод қамоқ жазосига ҳукм қилинган Усмон Кавала билан яқиндан таниш бўлган. Шу сабабли у ҳозирда 12 йил аввал бўлиб ўтган мамлакат тўнтарилишига ёрдам берганликда ва ҳукуматга қарши намойишларда қатнашганликда айбланмоқда.
Фото: Birgün Gazetesi
Шунингдек, Айше Барим Туркия кино саноатини ягона монополияга айлантириб, атрофига мухолиф ғоялари мавжуд бўлган актёр ва актрисаларни тўплашга уринганликда ҳам гумон қилинмоқда. У Ҳанде Эрчел, Серенай Сарикая ва бошқа машҳур турк юлдузлари билан ҳамкорликда ишлаган. Судга таклиф қилинган Ҳалит Эргенч эса Айшенинг ажойиб инсон эканлигига иймони комиллигини ва суд унга нисбатан ноҳақ айблов қўйишга уринаётганини айтган.
Фото: DW
Бу воқеа 2025 йил 28 январда маълум бўлди. Сўнг Туркия прокуратураси олинган маълумотлардан қониқмай, актёрга айбловлар қўйди. Орадан икки ой вақт ўтгани боис, иш ёпилгандек туюлди. Аммо маълум бўлишича, вазият янада жиддий тус олган.
Актёр тақдири нима бўлади?
Туркия матбуоти хабарига кўра, прокуратура Ҳалит Эргенчнинг ўзини ҳимоя қилишга уринишларини жазосиз қолдирилмайди. Яқин кунларда Туркияда навбатдаги суд жараёни бўлиб ўтиши режалаштирилган, у ерда прокурорлар “Муҳташам юз йил” фильми юлдузи ёлғон маълумот бергани бўйича далиллар тақдим этишади. Агар суд актёрнинг фойдасига бўлмаса, Ҳалит Эргенч тўрт йилга озодликдан маҳрум қилиниши мумкин.
Бундан ташқари, яна бир актёр Риза Кожаўғлига ҳам шундай айбловлар қўйилган. У “Тузоқ” ва “Чуқур” сериалларидаги роллари билан танилган.
Изоҳ (0)