2024 йилнинг 12 август куни замонавий кинонинг энг кўзга кўринган актрисаларидан бири Марям Узерли 41 ёшини нишонлади. Кўпчилик уни “Муҳташам юз йил” сериалидаги рақибларининг фитналарига қарши туриб, турк султони Сулаймоннинг қалбини забт эта олган Хуррам роли орқали танийди.
Болалиги ва ёшлиги
Марям ўзгача ташқи кўринишининг сабаби бор — унинг онаси немис, отаси турк. Қиз Германиянинг Кассел шаҳрида катта оилада туғилган. Беш ёшида у театр тўгарагига қатнаша бошлайди ва мактабдаги барча спектаклларда иштирок этади.
Мактабдан сўнг у Гамбургдаги театр мактабига ўқишга киради. Бир мунча вақт у маҳаллий театрда ўйнайди. Кейинчалик Берлинга кўчиб ўтади ва турли фильмлар эпизодларида рол ижро этади. Аммо олдинда уни оламшумул рол кутиб турарди.
Марям Узерли “Муҳташам юз йил”га қандай келиб қолган?
2010 йилда унинг ҳамкасби Марям Узерлига Туркияда йирик тарихий сериал суратга олинаётгани, бош ролга актриса кераклиги ҳақида айтади. Суратга олиш ишларига бир неча кун қолган эди, лекин Хуррам ролига мос актриса топилмаганди. Марям кастингдан муваффақиятли ўтади, аммо барча қийинчиликлар олдинда эди.
Узерли туркчани билмас, ролини фақат ёдлаб олганди. Вазият режиссёрнинг буйруқларини тушунмаганлиги сабабли қийинлашади. Аста-секин ҳаммаси ўз изига тушади. Марямга суратга олиш майдончасидаги ҳамкасблари, жумладан экранда унга қарши фитна уюштирганлар ҳам ёрдам беришади.
Марям Узерли ҳаёти бир кечада барбод бўлган Александра исмли қиз ролини ўйнайди. Унинг ота-онаси ўлдирилган, ўзи эса асир олиниб, Усмонли империяси ҳукмдори султон Сулаймон яшайдиган Тўпқопи саройига сотилади.
Кучли ва темпераментли қиз ҳарамдаги канизаклардан бири бўлишни хоҳламайди. Оқибатда у Сулаймонни (Ҳалит Эргенч) севиб қолади ва султоннинг қалбини забт этиб, Усмонли ҳукмдорининг рафиқасига айланади. Ҳарамда Александрага Роксолана исми берилган бўлса, султон Сулаймон уни Хуррам деб атайди, бу форс тилидан таржима қилинганда “қувонч келтирувчи" деган маънони англатади.
Бу жуфтлик ролини шу қадар ҳиссиётли ва ишончли ўйнайдики, томошабинлар улар ўртасидаги нимадир борлигига ишонишади. Узерлининг сўзларига кўра, аслида у бошқа одамни — Ўзан Гувенни (Рустам пошо) ёқтирган.
Марям Узерли ва Ҳалит Эргенч “Муҳташам юз йил” сериалида
Актриса суратга олиш майдончасида кунига 14 соатлаб ишлайди, шундан сўнг у ҳиссий жиҳатдан чарчай бошлайди. Марям Узерлининг ўзи тан олганидек, қаҳрамоннинг ҳарамга киришининг биринчи эпизодларини суратга олиш пайтиданоқ, у том маънода сарой деворлари унга босим ўтказаётганини ҳис қилган. Актрисанинг сўзларига кўра, у баъзида ҳақиқий Марям ва экрандаги Хуррам ўртасидаги чегара қаерда эканлигини тушунолмаган ва ақлдан озганини ҳис қилган.
Узерли ҳамма нарсадан шунчалик чарчаганки, учинчи мавсумдан кейин лойиҳани тарк этган. Тўртинчисида унинг ўрнини ҳамкасби Воҳиде Перчин эгаллайди. Актриса ҳеч кимга индамай, Берлинга кетиб қолади. Сериал ижодкорлари ундан жуда ғазабланишади. Фильм продюсери Тимур Савжи актриса бутун жамоани мавҳум вазиятда қолдирганини айтади. Марям сериални тарк этгач, унинг рейтинги кескин тушиб кетади.
Шахсий ҳаёти
Бироқ Узерли ҳаётида бошқа муаммолар ҳам етарлича эди. 2012 йилда у бизнесмен Жан Атешни севиб қолади. Аввалига улар ўртасидаги муносабатлар эртак каби эди, лекин кейин актриса тушкунликка тушиб қолади.
Марям ҳомиладор бўлгач, севгилиси унга аборт қилишни таклиф қилади. Кейинчалик маълум бўлишича, Жан Атеш Марямни яхши кўрмаган, балки ундан пиар сифатида фойдаланиб, имкон қадар тез-тез эътиборга тушишга ҳаракат қилган. 2015 йилда эса бу одам фирибгарлик туфайли халқаро қидирувга берилган. Шунга қарамай, бу муносабатлардан Марям Узерлининг Лара исмли қизи дунёга келади.
2020 йил сентябрь ойида актриса иккинчи бор ҳомиладорлигини эълон қилади. Унинг навбатдаги севгилиси исми ошкор этилмаган америкалик тадбиркор эди. У Марям, қизи Лара ва туғилмаган боласи ёнида бўлиш учун АҚШдан кўчиб келади. 2021 йил 8 январда Лили Кои исмли қизалоқ туғилади.
Афсуски, бу бахт узоққа чўзилмайди. Америкалик тадбиркор Германияда яшай олмайди ва Марямга ўзи билан АҚШга кетишни таклиф қилади. Аммо Марям рози бўлмайди ва ватанида қолади. Натижада бу никоҳ ҳам бузилади.
“Муҳташам юз йил”дан кейинги роллари
Марям Узерли “Муҳташам юз йил”дан кетиб қолганидан сўнг, кўпчилик уни фильмларга таклиф қилинмайди деб ўйлаган. Аммо бундай бўлмайди.
У “Тун маликаси”, “Она дарди”, “Мафия дунёни бошқара олмайди” ва бошқа сериалларда иштирок этади. 2023 йилда актриса асосий роллардан бирини ўйнаган “Ру” мини-сериали чиқади. Шундай қилиб, ҳозирда у ижоди ва қизларидан завқланиб, хотиржам ҳаёт кечирмоқда.
Изоҳ (0)