“Муҳташам юз йил” сериали томошабинларга кўплаб истеъдодли турк актёр ва актрисалари билан танишиш имконини берди. Уларнинг карьераси давомида кўплаб бошқа лойиҳалар бўлишига қарамай, айнан шу тарихий лойиҳадаги роллари билан машҳур бўлди. Қуйида машҳур сериалда бош ролларни ижро этган юлдузларнинг бошқа сериаллардаги иштирокини баҳолашга таклиф қиламиз.
“Бобил” (2020)
Профессор Ирфоннинг ҳаёти бир кунда ўзгариб кетади — у университетдан ҳайдалади, ўғлига эса жиддий ташхис қўйилади. Муаммолар туфайли қаҳрамон таваккал қилишга қарор қилади ва бадавлат тадбиркордан катта миқдорда қарз олиб, ёшликдаги дўсти билан фирибгарлик йўлига киради. Аммо Ирфон бунинг уддасидан чиқа олмайди, балки аксинча, муаммолар ботқоғига янада чуқурроқ ботади. Шундай кунларнинг бирида унинг аввалги муҳаббати ҳаётида пайдо бўлади ва вазият янада мураккаблашади. Эндиликда Ирфон ва Эгеменни ҳал қилиши керак бўлган кўплаб муаммолар кутиб кутади.
“Бобил” сериали кўплаб дизи мухлисларининг эътиборидан четда қолмаган қизиқарли лойиҳадир. Ажойиб актёрлик таркиби, мафиялар жамоаси найранглари, севги, дўстлик, хиёнат ва оила каби долзарб муаммолар ёритилган сериал турк юлдузлари мухлисларига манзур бўлиши шубҳасиз.
Бош ролларда: Ҳалит Эргенч, Нур Феттаҳўғлу, Озан Гувен ва бошқалар.
“Канага” (2018)
Мардин Тамаи — отасини излашга кетган квант физикаси мутахассиси. Унинг отаси археолог бўлиб ишлаган ва бир неча йил аввал тўсатдан ғойиб бўлган. Мардин отасининг дўсти билан учрашиб, олдинда уни кўплаб очилмаган сирлар кутаётганини англайди. У нафақат падарининг ғойиб бўлгани сабабини, балки ўзининг қандай дунёга келгани ва болаликдаги тарихи ҳақида ҳақиқатни билиб олади.
“Канага” Туркия сериаллари стандартларига кўра умуман ўзгача йўналиш ва мавзудаги лойиҳадир. Актёр Меҳмет Гунсур иштирокидаги мини сериалда илм-фан ва фентези жанрлари бирлашган. Унда квант физиклари, яширин кучлар мавжудлигини эътироф этувчи оккултистлар, юқори интеллект, вақт спирали каби мавзулар ёритилади ва томошабинни бутунлай ўзига жалб қилади.
Бош ролларда: Меҳмет Гунсур, Кеворк Маликян, Эртуғрул Доған ва бошқалар.
“Жоним фидо” (2018)
Капитан Алпарслон махсус ҳарбий бўлим бошлиғи бўлиб, у доимо раҳбарият буйруқларини сидқидилдан бажариб келади. Капитан ўзининг ва қўл остидагиларнинг ҳаёти доим хавф остида бўлишига ўрганиб қолган. Аммо у турк армиясига ва, хусусан, унинг бўлимига қарши режалаштирилган фитна ҳақида билиб қолади ва Алпарслон олдида жуда мураккаб вазифа пайдо бўлади: у ўз ҳаётини сақлаб қолиши ва хоинларни фош этиши керак бўлади.
Бурак Ўзчивит ва Керем Бурсин иштирокидаги драма ушбу актёрлар аввал суратга тушган бошқа лойиҳалардан тубдан фарқ қилади. Мазкур сериалда улар турк ҳарбий кучларининг жасур жангчилари сифатида гавдаланади.
Бош ролларда: Бурак Ўзчивит, Керем Бурсин, Мелике Ялова ва бошқалар.
“Бол қаймоқ” (2018)
Одам ва Ҳавво умр бўйи бирга яшаб келган кекса турмуш ўртоқлардир. Бироқ қариган чоғда улар шу қадар катта жанжал қиладики, тўполон бутун қишлоқни икки лагерга бўлиб ташлайди. Одам қишлоқдаги энг яхши асални ишлаб чиқаради, Ҳавво эса энг мазали қаймоқ тайёрлайди. Ёз кунларининг бирида уларнинг Баде исмли набираси қишлоққа ташриф буюради. Унинг ота-онаси Баде чақалоқлигида вафот этган бўлади. Аммо уни қишлоқдагилар очиқ чеҳра билан кутиб олмайди. Баде ўзининг ёшлигига қарамай, вазиятни тўғрилашга қарор қилади, шундай қилиб у Ҳавво ва Одамни яраштиришга бел боғлайди.
Мазкур фильм оила даврасида кўриш мумкин бўлган эзгулик ва меҳрга тўла лойиҳадир. Унда уч нафар турк юлдузи — Филиз (Нигор халфа), Сабина (Афифа хотин) ва “Муҳташам юз йил” фильмида иштирок этмаган бўлса-да, томошабинларга яхши таниш бўлган Берен Гокйилдиз бош ролларни ижро этган.
Бош ролларда: Филиз Аҳмет, Сабина Айрула, Берен Гокйилдиз ва бошқалар.
“РУ: Турк ошхонаси” (2024)
Райён — ҳаётида қийин даврни бошдан кечираётган, аммо молиявий жиҳатдан муваффақиятли аёл. Турмуш ўртоғи билан ажрашгач, ресторанга эгалик қилиш ҳуқуқини сақлаб қолишга муваффақ бўлади. Айнан шу ерда бош қаҳрамон ўзидан анча кичик бўлган Узер исмли йигитни учратади. Уларнинг орасидаги 20 ёш фарқ жуфтликнинг ҳис-туйғуларига тўсқинлик қилмайди, аммо Райён ва Узер атрофдаги одамларнинг турли танқидларига дич келади.
Бош ролларда: Марям Узерли, Бурак Беркай Акгул, Эмре Караэл ва бошқалар.
“Туркча детектив” (2023)
Сериалнинг номи унинг сюжетини тўлиқ акс эттиради. Унга кўра, Четин Икмен исмли терговчи қотиллик бўлимини бошқаради. У ўз соҳасининг ҳақиқий профессионали ва ҳар бир операция ортида бош ролда турадиган муҳим кадрдир. Айнан унинг қўл остида Ойша Фарсаҳўғлу ва Лондондан қайтган терговчи Меҳмет Сулаймон ишлайди. Биргаликда улар нафақат энг мураккаб жиноятларни тергов қилиш, балки шахсий муаммоларини ҳал қилишга бел боғлайди.
Бош ролларда: Халук Билгинер, Ёсамин Аллен, Селма Эргенч ва бошқалар.
“Фи, Чи, Пи” (2017)
Туркия учун ноодатий ҳисобланган “Фи Чи Пи” сериалида таниш чеҳралар талайгина. Масалан, бош ролларни Меҳмет Гунсур ҳамда Ўзан Гувен ижро этган. Психологик триллер марказида истеъдодли психиатр Жан Манай туради. У муваффақиятли карьера қуриб, ўз соҳасининг ҳақиқий юлдузига айланган. Муаммо шундаки, унинг ҳам қалбида қоронғи томонлари бор ва бу томонлар унга балерина Дуру ёқиб қолган пайтдан бошлаб тобора аниқ кўрина бошлайди. У севиб қолади, лекин бу туйғу муҳаббатдан кўра кўпроқ қарамликка ўхшайди. Ахир Жан психологик ҳийлаларни яхши билади. Сўнг у Дуру ва қаллиғининг ҳаётини тун-у кун кузатишни бошлайди.
Бош ролларда: Меҳмет Гунсур, Озан Гувен, Серенай Сарикая, Беррак Тузюнатач ва бошқалар.
Изоҳ (0)