“Муҳташам юз йил” сериалидаги тарихий фактлар бузилган ҳолатлар

Туркия кино саноатининг ҳақиқий юлдузига айланган, бир нечта хорижий тилларга таржима қилинган “Муҳташам юз йил” сериали бутун дунё томошабинлари қалбидан чуқур жой олган. Сериал шунчалик қизиқарли-ки, ундаги воқеалар реал ҳаётда ҳам содир бўлган деб кўпчилик ишонади. Аслида эса сериалда тарихга зид бўлган воқеалар ва персонажлар жуда кўп.

Эҳтимол, Хуррам султон дунёдаги энг машҳур канизаклардан бўлса керак. “Муҳташам юз йил” сериалида актриса Мерьем Узерли ўз образини маҳорат билан ижро этгани учун кўпчилик Хуррам хоним ҳаётда ҳам шундай характерга эга деб ўйлайди, бироқ буларнинг бари ҳақиқатдан йироқдир.

1-янглиш фикр: Хуррам саройда омон қолиш учун доим фитна уюштирган

Сериал сюжетига кўра, Александра Сулаймон султон саройида ўз ҳаётини сақлаб қолиш учун рақиблар орасида фитна қўллайди, унинг хийлалари сарой аҳли бир-бирига душман бўлишига олиб келади. Шунингдек, Хуррам фарзандлари манфаати учун Сулаймон ҳис-туйғулари билан ўйнайди.

Аммо буларнинг бари тўқима сюжетдир. Тарихчиларнинг сўзларига кўра, Александра ҳаётда чуқур илмга эга оқила аёл бўлганлиги сабабли давлат ишларида фаол иштирок этган, у бир нечта хорижий тилларни мукаммал билган. Шунингдек, бўш вақтини фитначилик билан эмас, балки илм эгаллашга сарфлаган.

2-янглиш фикр: Хуррам Султон саройдаги канизаклар билан рақобатлашган

Сериалда Хуррам доим канизаклар билан рақобатлашиб, уларни султондан четлаштиришга уриниб келади. Тарихда эса султон Александрага уйлангач, ҳарамдаги барча канизакларни тарқатиб юборади. Сулаймоннинг ягона умр йўлдоши — Хуррам султон “ҳасеки” унвонига эга бўлади (сериалда Мохидавронга ҳам шундай унвон берилгани катта хатолик эди). Демак, Хуррамнинг душманлари бўлмаган.

3-янглиш фикр: Хуррам гўзалликда тенги йўқ, Сулаймон ҳам келишган киши бўлган

Табиатан гўзал актриса Мерьем Узерли сериалда ёрқин либосларда Хуррам образини моҳирона гавдалантирган. Тарихда эса Александра Роксолана паст бўйли, оғир вазнли аёл бўлган. Унинг бурни катта, лаблари ингичка, қошларининг ранги очлигидан деярли билинмаган.

Сулаймон султон ролини ижро этган Ҳалит Эргенч ўзининг ташқи кўриниши билан кўпгина томошабинларга манзур бўлган, аммо тарихий султон ҳам идеал эмас эди: Сулаймоннинг кўриниши  семиз бўлган, доимий эгарда юргани учун оёқлари деформацияланган. Сериалдагидек соқоли ҳам бўлмаган, бўйи 165 сантиметрдан ошмаган.

Шундай қилиб, “Муҳташам юз йил” сериалига фақатгина йирик тарихий воқеалар ва фактлар асос қилиб олинган.