“Муҳташам юз йил” сериали Туркия кино саноатининг ҳақиқий юлдузига айланган, айнан шу лойиҳа унда иштирок этган ёки дебют қилган кўплаб актёр ва актрисалар карьерасида бурилиш ясаган. Қуйида сериалнинг бош қаҳрамонлари ҳозирда қаерда ва қандай яшаётгани ҳақида маълумот берамиз.
Марям Узерли
Дунёдаги энг машҳур канизаклардан бири ролини ижро этган актриса Туркияда эмас, балки Берлинда яшайди, чунки у асли германиялик. Актриса шаҳар марказидаги уч хонали кенг ва шинам хонадонда яшайди, у тармоққа жойлаштирадиган суратларга кўра, уйнинг ички кўриниши ёруғ ва ёрқин рангда.
Узерли камдан кам ҳолларда квартирасини кўрсатиши ва шахсий ҳаёти ҳақида маълумот бериши мумкин. Актрисанинг икки нафар фарзанди бор. У тўнғич қизининг отаси билан ажрашган, иккинчи фарзандининг отаси эса улар билан бирга яшайди. Манбаларга кўра, актрисанинг турмуш ўртоғи америкалик тадбиркордир.
Ҳалит Эргенч
Актёр оиласининг фотосуратларини доим ҳам тармоқдаги обуначилари билан бўлишавермайди, аммо баъзан фарзандлари билан вақт ўтказаётган дамларни кўрсатиши мумкин. Эргенч Истанбулдаги кенг боғ ва ҳовузга эга ҳовлида яшайди. Хонадон панорамали кенг деразалар, деворларда турли расмлар, қулай мебелларга тўла.
Небаҳат Чеҳре
Актриса бу йил 80 ёшни қаршилайди. Унинг ҳаёти осон кечмаган, Чеҳре 15 ёшида уйини тарк этди ва мустақил яшай бошлади. Небаҳатнинг биринчи турмуш ўртоғи Йилмаз Гуней золим эр бўлган ва рафиқасининг кинодаги муваффақиятига ҳасад қилган. Бундай никоҳ узоққа чўзилмаган, аммо иккинчи турмуш ҳам актрисага бахт олиб келмаган. Небаҳатнинг фарзандлари йўқ, чунки у бутун ҳаётини санъатга бағишлаган. У Истанбулдаги шахсий уйида яшайди, хонадондаги барча деталлар жиддий ва классик услубда жойлаштирилган.
Бурак Ўзчивит
Турк киноюлдузи Бурак Ўзчивит ўзининг тўрт қаватли ҳашаматли хонадонида оиласи билан яшаб келмоқда. Бу уйда кўпчиликнинг орзусидаги шароит муҳайё: у ерда катта сув ҳавзаси, кўркам боғ, кенг хоналар бор.
Уйнинг ички дизайни учун Ўзчивит оиласи ҳеч қандай дизайнер ёлламаган — барчасини ўзлари бажарган. Уйнинг дизайни минимализм ва классика услубида бўлиб, оч ранглардан фойдаланилган. Ҳеч қайси хонадаги деворда расмлар, фоторамкалар йўқ. Барча мебеллар табиий материаллар — ёғоч, гранитлардан ясалган. Хонадон шифт ва деворлари турли хилдаги ҳайкалтарошлик безаклари, ғиштин нақшлар билан безатилган.
Пелин Карахан
“Муҳташам юз йил” сериалида султон Сулаймоннинг қизи ролини гавдалантирганидан кейин машҳурликка эришган турк актрисаси Пелин Карахан уч қаватли ҳашаматли уйда истиқомат қилади. Кенг, дизайнерлик мебеллари билан қопланган ҳамда оилавий дам олиш мумкин бўлган катта меҳмонхонада уйнинг ўзига хослиги акс этган. Айнан шу меҳмонхонадан ҳовузли террасага чиқса бўлади. Уйнинг олдидаги майдонда жойлашган боғ яшил майсалар билан қопланган.
Хонадонда замонавий дизайнерлик мебеллари, сузиш ҳавзаси, улкан терраса, дам олиш жойи, шинам ошхона мавжуд. Актриса санъатни, этник услубни яхши кўради. Пелин берган интервьюсида бутун умри давомида шундай уй ҳақида орзу қилганини таъкидлаган.
Окан Ялабик
Актёр Истанбулнинг Европа қисмидаги нуфузли ҳудудда жойлашган хонадонда яшайди. Унинг уч қаватли уйи фотосуратлари деярли ҳеч қаерда йўқ. Актёр жуда камдан кам ҳолларда ижтимоий тармоқларда ўзи ҳақида маълумот беради. Аммо турк оммавий ахборот воситаларида Ялабик бир неча бор камераларга тушиб қолган. Ҳовли классик услубда қурилган, унда катта балкон, кенг боғ ва бир нечта дам олиш зоналари мавжуд.
Изоҳ (0)