Жан Яман, Бурак Ўзчивит, Киванч Татлитуғ ва бошқа машҳур турк актёрлари кинодаги карьераси давомида қанчалик ўзгарган? (фото)

Турк кино оламидаги лойиҳаларнинг муваффақиятли чиқиши сценарийга, шу билан бирга актёрларнинг ижросига ҳам боғлиқ. Қайсидир актёр ташқи кўриниши билан, бошқаси ижроси билан, яна қайсидир актёр эса яхши лойиҳада суратга тушгани билан мухлислар ёдида қолади. “Яндекс Дзен” нашри нафақат Туркияда, балки дунё бўйлаб машҳурликка эришган актёрлар карьераси давомида қанчалик ўзгаргани ҳақидаги маълумотларни тақдим этди.

Бурак Ўзчивит

Бурак Ўзчивит 2006 йилда ўзининг биринчи ролини “Минус 18” сериалида ижро этди, орадан 5 йил ўтиб афсонавий “Муҳташам юз йил” сериалида суратга тушди. Актёр ҳозирга қадар 15 та лойиҳада рол ўйнаган. Бурак Ўзчивит иштирокидаги охирги лойиҳа 2023 йилда экранларга чиққан “Усмон: Қурилиш” сериали бўлди.

Ҳалит Эргенч

Ҳалит илк марта 1994 йилда фильмларда суратга туша бошлаган. Бироқ у “Муҳташам юз йил” (2011—2014 йилларда намойиш этилган) фильмида Султон Сулаймон ролини ижро этганидан кейин ҳақиқий юлдузга айланди. Актёр иштирокидаги сўнгги фильм 2021 йилда чиққан.

 Али Эрсан Дуру

Али ўз фаолиятини 2011 йилда “Ҳаёт давом этмоқда” сериалида бош рол билан бошлаган. Орадан 7 йил ўтиб у машҳур “Қалбимнинг султони” сериалида суратга тушди. Актёрнинг сўнгги ишлари орасида 2022 йилда намойиш этилган тўлиқ метражли “Мунажжимлар башорати” лойиҳаси бор.

Жан Яман

2014 йилда Жан “Юрак ишлари” сериалида суратга тушди. 2018 йилда актёр иштирокидаги муваффақиятли “Эрта учган қуш” лойиҳаси эфирга узатилди. Жорий йилда Жан иштирокидаги “Турк” сериали экранларга чиқиши режалаштирилган.

 Серкан Чайўғлу

2012 йилда намойиш этилган “Кузей Гуней” Серканнинг фаолиятидаги илк сериал бўлди. 2 йилдан сўнг у “Гилос мавсуми” фильмида бош ролни ўйнади ва яқинда актёр иштирокидаги “Орегон” сериали чиқди.

Киванч Татлитуғ

2005 йилдан 2007 йилгача Киванч иштирокидаги “Кумуш” лойиҳаси эфирга узатилди, шундан сўнг у “Тақиқланган севги” сериалида суратга тушди. 2023 йилда актёр бош ролни ижро этган “Истанбулга қилинган сўнгги қўнғироқ” фильми экранларга чиқади.

Энгин Акюрек

2006 йилда экранларга чиққан “Тақдир” лойиҳаси Энгиннинг биринчи ишига айланди. Орадан 8 йил ўтиб у “Эйлулнинг кичик муаммоси” лойиҳасида рол ўйнади. Унинг иштирокидаги сўнгги  “Қочиш” сериали 2023 йилда экранларга чиқди.

Окан Ялабик

“Сарсон” сериали (2003—2004 йилларда намойиш этилган) Окан учун кинодаги биринчи жиддий лойиҳалардан бирига айланди. Бироқ кўплаб томошабинлар уни “Муҳташам юз йил” сериалидаги Иброҳим роли орқали танийди. Ушбу машҳур сериалда у 2011 йилдан 2012 йилгача рол ўйнаган. 2022 йилда чиққан “Азизим” фильмида Окан бош роллардан бирини ўйнади.

Толга Сариташ

2009 йилда Сариташ карьерасидаги илк сериал — “Қора булут”да суратга тушган, 2013—2014 йилларда эса у “Муҳташам юз йил” сериалида рол ижро этган. Ўтган йили унинг иштирокидаги “Ота” сериали эфирга узатилди.

Арас Булут Ийнемли

Арас Булут 2013—2014 йилларда “Муҳташам юз йил” сериалида суратга тушди. 2023 йилда эса унинг иштирокидаги “Отатурк” номли янги сериал экранларга чиқарилади.

Чағлар Эртуғрул

Эртуғрулнинг экрандаги илк чиқиши 2012 йилда “Тоғ” фильмида бўлган. Актёр “Намойиш этилган муҳаббат” сериалида суратга тушганидан кейин машҳурликка эришди. 2023 йилда унинг иштирокидаги “Магарсус” сериалининг экранларга чиқиши режалаштирилган.