Жанубий Корея ўзбекистонлик ишчиларни кемасозлик саноатининг йирик маркази бўлган Улсан шаҳри учун махсус дастур доирасида ўқитади ва иш билан таъминлайди. Бу ҳақда Кореатимес хабар бермоқда.
Корея Меҳнат ва бандлик вазирлигига кўра, тахминан 280 нафар ишчи Ўзбекистонда кемалар қуриш учун зарур бўлган билим ва кўникмаларга эга бўлиш учун ўқитилади. Улар жорий йил охирида Э-9 ишчи визаси билан Кореяга келиб, кемасозлик компанияларида иш бошлайди. Бу виза қишлоқ хўжалиги, қурилиш ва ишлаб чиқариш каби жисмоний меҳнат талаб қилинадиган соҳалардаги хорижий ишчилар учун мўлжалланган.
Дастур ҳукуматнинг жорий йилда хорижий давлатлардан 130 000 кишини Э-9 визаси асосида иш билан таъминлаш режасининг бир қисми сифатида ишга туширилган.
Дастлабки ишчи гуруҳининг ўқитилиши март ойининг 18-кунидан Ўзбекистон ҳукумати томонидан ажратилган марказда бошланади. Бу икки давлат ўртасидаги келишувнинг бир қисми ҳисобланади. Ўқитиш харажатлари Улсан шаҳар ҳокимияти томонидан қопланади.
Дастлабки гуруҳ Кореяга июль ойида етиб келиши кутилмоқда. Йил давомида қўшимча гуруҳлар келади.
“Пилот лойиҳа муҳим аҳамиятга эга, чунки маҳаллий ҳокимият ва компаниялар ўзлари учун зарур бўлган ишчиларни бевосита тайёрлашда иштирок этади. Натижада, компаниялар малакали ишчиларга эга бўлишади, ишчилар эса тез мослашади. Бу эса ўз навбатида, ходим ва ишчилар ўртасидаги мулоқотни яхшилайди, бахтсиз ҳодисалар сонини камайтиради ва иш унумдорлигини оширади. Бу тажриба дастурининг натижаларидан келиб чиқиб, келажакда бошқа саноат тармоқлари учун ҳам шундай мослаштирилган дастурлар жорий қилишни кўриб чиқамиз.” дейилади вазирлик баёнотида.
Дастлаб дастур кемасозлик соҳасидан бошланади, кейин эса маҳаллий ҳокимият ва компаниялар иштирокидаги ҳамкорлик моделларини кенгайтирилиши режалаштирилган.
Кема саноатида Осиё давлатлари етакчи
Жанубий Корея кема ишлаб чиқариш саноатида етакчилардан бири ҳисобланади. Кореянинг дунё кемасозлик саноатидаги улуши 29,3 фоизни ташкил этади. Бу борада кореяликлар 2-ўринда туради.
Хитой саноатнинг 53,3 фоиз улушига эгалик қилган ҳолда дунёда биринчи ўринда. Учликни Япония 13,1 фоиз улуш билан якунлаб берган. Қолган барча давлатларнинг кема саноатидаги улуши 4,4 фоизни ташкил қилади, жумладан, АҚШ кема ишлаб чиқариш саноатида 0,1 фоиз улушга эга.
Изоҳ (0)