Ўзбекистон фуқароси Жанубий Кореянинг Сеул шаҳридан 7,4 миллиард вонга (тахминан 5 миллион 94 минг доллар) квартира сотиб олди. Бу ҳақда Choson.biz нашри хабар берди.
Қайд этилишича, Сеул шаҳридаги машҳур Банпо Хи турар жой комплексида жойлашган 244 метр квадрат майдонга эга квартирани 41 ёшли фуқаро А. сотиб олган. 2024 йил ноябрида амалга оширилган ушбу битим ҳудуддаги энг қиммати бўлган.
Ҳисоб-китоб тўлиқ нақд пулда амалга оширилгани айтилмоқда, чунки мулк далолатномасида алоҳида ипотека рўйхатдан ўтказилмаган. Харидорнинг манзили сифатида Тошкентдаги “Корея—Ўзбекистон анъанавий тиббиёт клиникаси” кўрсатилган.
Банпо Хи — 3410 та турар жойдан иборат катта мажмуа бўлиб, бу ердаги хонадонларда Жанубий Кореянинг бир қатор бой ва машҳур инсонлари яшайди.
Бундан аввал Ўзбекистон фуқаролари Россияда уй-жой сотиб олувчи норезидентлар бўйича топ учликка киргани ҳақида хабар берилган эди.
Изоҳ (0)