Ўзбекистоннинг 2 млнга яқин фуқароси меҳнат муҳожири сифатида рўйхатдан ўтгани қайд этилди

Бугунги кунда Ўзбекистоннинг 2 миллионга яқин фуқароси (32 миллион аҳолидан) Россия, Қозоғистон ва Жанубий Корея каби давлатларда меҳнат муҳожири сифатида рўйхатдан ўтган. Бу ҳақда ЎзА хабар берди.

Бунинг оқибатида болаларни институционал муассасаларга (интернатлар) узоқ вақтга ташлаб кетиш ҳолатлар кўпайиб бормоқда. Ҳозирда меҳнат миграциясининг оила ва болаларга таъсирини ўрганиб чиққан расмий тадқиқотлар мавжуд эмас. Шунингдек, болалар ҳимоясига ва миграцияни салбий оқибатларини бартараф этишга қаратилган таклифлар ҳам мавжуд эмас.

Мазкур ижтимоий вазиятдан келиб чиқиб, Ўзбекистон Хотин-қизлар қўмитаси ЮНISEФ халқаро болалар жамғармаси билан ҳамкорликда «Миграция оқибатида ҳимояга муҳтож бўлган болаларни ҳимоя қилиш» мавзусидаги халқаро лойиҳага қўл урди.

11 июнь куни мазкур масалалар бўйича эскпертларнинг дастлабки учрашуви бўлиб ўтди. Учрашувда Ўзбекистон Хотин-қизлар қўмитаси, ЮНISEФ, Ташқи ишлар, Халқ таълими вазирликлари, «Оила» илмий-амалий маркази, Республика болалар ижтимоий мослашув маркази вакилларидан иборат эксперт гуруҳи иш бошлади.

Мазкур лойиҳа 36 ойга мўлжалланган бўлиб, мамлакатнинг 4 вилоятини қамраб олиши кутилмоқда. Лойиҳа давомида мигрант оилаларнинг фарзандларини ижтимоий-иқтисодий ҳимоя қилиш, уларнинг ҳар томонлама камол топиши асосий мақсад этиб белгиланди.