Жанубий Корея президенти Юн Сок Ёл 7 декабрь кунги телемурожаатида фуқаролардан ҳарбий ҳолат жорий этилгани учун узр сўради.
Мамлакат президенти ўз келажагини ҳукмрон партия белгилашини таъкидлади.
“Мен қаттиқ ҳайратда қолган фуқаролардан чин дилдан узр сўрайман. Партиямизга сиёсий вазиятни барқарорлаштириш имкониятини бераман, жумладан, менинг лавозимдаги фаолиятим масаласини ҳам”, деган Юн.
Жанубий Корея президенти фуқароларга мурожаатида, шунингдек, ҳарбий ҳолатни қайта жорий қилмаслигига ваъда берди:
“Очиғини айтаман, ҳеч қачон иккинчи ҳарбий ҳолат бўлмайди”, деди у.
Жанубий Корея президенти Юн Сок Ёл 3 декабрь куни кечқурун мамлакатда фавқулодда ҳарбий ҳолат эълон қилди. У 45 йил ичида мамлакатда ҳарбий ҳолат эълон қилган биринчи давлат раҳбари бўлди. Парламент ва сиёсий партияларнинг фаолияти тақиқланди. Давлат раҳбари бу қарорни “конституциявий тартибни ҳимоя қилиш ва мамлакат ичидаги Шимолий Корея тарафдорларини йўқ қилиш” зарурати билан изоҳлади.
Ҳукумат ҳаракатларидан норози бўлиб, парламент биноси олдида намойишчилар тўпланди. Полиция парламентга киришни тўсиб қўйди ва шаҳар кўчаларида ҳарбий техника пайдо бўлди.
Бир неча соатдан сўнг 300 депутатдан 190 нафари парламентга киришга муваффақ бўлди ва ҳарбий ҳолатни бекор қилиш учун овоз берди. Мухолифат етакчиси Ли Же Мен президент қарорини “конституцияга зид” деб атади ва уни “халққа қарши” қадам сифатида қоралади. Кечроқ Жанубий Корея президенти мамлакатда жорий этилган ҳарбий ҳолатни бекор қилишга рози бўлди.
Мудофаа вазири истеъфога чиқди
4 декабрь куни мудофа вазири Ким Ёнг Ҳьюн ҳарбий ҳолат жорий этилиши муносабати билан истеъфога чиқишга тайёрлигини маълум қилди. У юзага келган барча тартибсизликлар учун жавобгарликни ўз зиммасига олиб, истеъфога чиқди. Бунга мухолифатдаги етакчи “Тобуро” демократик партияси мудофаа вазирига импичмент эълон қилгани туртки бўлди.
Президентга қарши импичмент
Жанубий Корея мухолифати президентга қарши импичмент лойиҳасини ҳам парламентга тақдим этди. Овоз бериш лойиҳа мажлисда кўриб чиқилганидан кейин 24-72 соат ичида ўтказилиши керак. Импичмент лойиҳасини киритишни олтита мухолифат партиясидан 191 нафар депутат қўллаб-қувватлади. Парламентда жами 300 нафар қонун чиқарувчи бор, 108 ўринни президентнинг “Фуқаролик кучи” партияси эгаллаб турибди. Импичмент эълон қилиш учун 200 овоз керак.
Изоҳ (0)