Жанубий Корея собиқ мудофаа вазири Ким Ёнг Ҳьюн мамлакатда ҳарбий ҳолат жорий этишда иштирок этгани учун 8 декабрь куни ҳибсга олинди. Бу ҳақда прокуратура баёнотига таяниб Reuters хабар берди.
Собиқ вазир ихтиёрий равишда Сеулнинг Марказий тумани прокуратурасига келиб, сўроқдан ўтган. Шундан сўнг Ким Ёнг Ҳьюн ҳибсга олинган, унинг телефони эса мусодара қилинган.
Ким Ёнг Ҳьюн 4 декабрь куни истеъфога чиққанди ва президент Юн Сок Ёл 3 декабрь куни мамлакатда қисқа муддатли ҳарбий ҳолат жорий этгани учун масъулиятни ўз зиммасига олганди. Айнан мудофаа вазири президентга ҳарбий ҳолат жорий этишни таклиф қилган, деб тахмин қилинмоқда.
Жанубий Корея прокуратураси мамлакатда ҳарбий ҳолат жорий этилгани муносабати билан исён ва ҳокимиятни суиистеъмол қилиш бўйича иккита жиноий ишни тергов қилмоқда. Президент Юн Сок Ёл исёнда гумонланувчи сифатида қаралмоқда.
Кореяда ҳарбий ҳолат
Жанубий Корея президенти Юн Сок Ёл 3 декабрь куни кечқурун мамлакатда фавқулодда ҳарбий ҳолат эълон қилди. Парламент ва сиёсий партияларнинг фаолияти тақиқланди. Давлат раҳбари бу қарорни “конституциявий тартибни ҳимоя қилиш ва мамлакат ичидаги Шимолий Корея тарафдорларини йўқ қилиш” зарурати билан изоҳлади.
Ҳукумат ҳаракатларидан норози бўлиб, парламент биноси олдида намойишчилар тўпланди. Полиция парламентга киришни тўсиб қўйди ва шаҳар кўчаларида ҳарбий техника пайдо бўлди.
Бир неча соатдан сўнг 300 депутатдан 190 нафари парламентга киришга муваффақ бўлди ва ҳарбий ҳолатни бекор қилиш учун овоз берди. Мухолифат етакчиси Ли Же Мен президент қарорини “конституцияга зид” деб атади ва уни “халққа қарши” қадам сифатида қоралади. Кечроқ Жанубий Корея президенти мамлакатда жорий этилган ҳарбий ҳолатни бекор қилишга рози бўлди.
Мудофаа вазири халқдан узр сўради
4 декабрь куни мудофа вазири Ким Ёнг Ҳьюн халқдан узр сўраб, истеъфога чиқишга тайёрлигини айтди. У юзага келган барча тартибсизликлар учун жавобгарликни ўз зиммасига олиб, истеъфога чиқди. Бунга мухолифатдаги етакчи “Тобуро” демократик партияси мудофаа вазирига импичмент эълон қилгани туртки бўлди.
Изоҳ (0)