Нью Йоркда сунъий интеллект ва театр ноодатий бир лойиҳада бирлашди: Unitree Go2 номли робот ит “The Robot, the Spy, and the love of Art AI” (Робот, жосус ва сунъий интеллектга муҳаббат) спектаклида дебют қилди.
Ушбу комедия ва илмий фантастика элементларини ўзида мужассам этган спектакл Chain Winter One Act фестивали доирасида 1 мартга қадар “Chain Theater” театрида намойиш этилади.
Мазкур ноодатий спектакл ғояси америкалик драматург Жон Артур Лонгга тегишли бўлиб, у илк бор Gо2 Prо роботини интернетдаги видеороликларда кўриб қолди ва уни сотиб олди. Сўнг Жон янги спектакл учун сценарий ёзди ва роботнинг техник имкониятларидан келиб чиққан ҳолда уни сюжетга киритди. Cnet нашрига берган интервьюсида Лонг бу ҳақда сўзлаб берди:
“Мен ҳеч қачон саҳнада ҳақиқий робот рол ўйнаганини кўрмаганман” деди ва лойиҳанинг ўзига хослигини қайд этди.
“Томошабинлар Unitree Go2 Pro’ни кўриб, унинг тўрт оёқли Олапар образини гавдалантиришидан ҳайратда қолиши шубҳасиз. Бу спектакл фильмларда ақлли машиналарни томоша қилиш каби оддий эмас” дейди Chain театрининг бадиий раҳбари Кирк Гостковски.
Хитойнинг Unitree компанияси томонидан ишлаб чиқилган Unitree Gо2 Prо роботи Boston Dynamics компаниясининг таниқли Spot роботига рақобатчи ҳисобланади. Унинг нархи 1600 доллардан бошланади. Корпуси алюминий ва муҳандислик пластигидан тайёрланган. Роботнинг оғирлиги тахминан 15 кг бўлиб, 3D лидар, кенг бурчакли камера, Wi-Fi 6, Bluetooth 5.2 ва 8000 мА/с сиғимли аккумулятор билан жиҳозланган.
Оператор Дарел Гарсия робот ҳаракатларини махсус илова орқали бошқаради. Унинг сўзларига кўра, 90 фоиз ҳаракатлар қўлда амалга оширилади. Роботнинг сакраши ва панжалар ҳаракати каби мураккаб элементлар аввалдан дастурлаштирилади.
Gо2 Prо кучукларга хос ҳаракатларни кўрсатишдан ташқари, салто қилиш, рақсга тушиш кабиларни ҳам бажара олади. Роботга реал вақт режимида актёр Девид Рей овоз беради ва шу тарзда “тирик” персонаж иллюзиясини яратади.
“Комедияда томошабиннинг муносабати муҳим. Агар томошабин кулса, актёр пауза қилиши керак. Бу жонли театрнинг ўзига хос элементларидан биридир”, дейди спектакл режиссёри Кирк Гостковски.
Асар сюжети сунъий интеллект ҳукмрон бўлган дунёда инсоният ва табиат ўртасидаги алоқалар ҳақидадир. Робот иштирокида ўтказиладиган бундай тажриба замонавий технологиянинг жонли саҳналарни қанчалик ўзгартириши мумкинлигини намоён қилади. Unitree Go2 нинг театрдаги дебюти роботларнинг янги даври бошланишини кўрсатиб бериши мумкин.
Изоҳ (0)