Counterpoint Research таҳлилий компанияси 2024 йилда энг кўп сотилган смартфонлар рейтингини тақдим этди. iPhone 15 ўтган йилги iPhone 14 нинг муваффақиятини такрорлаб, жорий йилги рейтингда яна биринчи ўринни эгаллади. iPhone 15 нинг асосий бозорлари АҚШ ва Хитойда бўлиб, ушбу давлатлар йиллик сотувларнинг деярли ярмини ташкил қилади.
Иккинчи ва учинчи ўринларни iPhone 15 Pro Мах ва iPhone 15 Pro эгаллади. Мижозларнинг юқори сифатли смартфонларга бўлган қизиқиши ортиб бориши билан iPhoneнинг асосий версияси ва Pro моделлари ўртасидаги сотув фарқи аста-секин қисқармоқда. Эътиборли жиҳати шундаки, учинчи чоракда илк бор iPhone умумий сотувининг ярми айнан Pro версиялари ҳисобига тўғри келди. Ушбу ўзгариш Appleга қимматроқ қурилмаларни сотишни рағбатлантиришга ёрдам беради, дейди экспертлар.
Samsung топ-10 талик рейтингида тўртта ўринни эгаллаб, юқори мавқейини сақлаб қолди. Galaxy А15 5G смартфони дунёдаги энг кўп сотилган тўртинчи смартфон бўлди. Ушбу модел, айниқса, Шимолий Америкада яхши ишлади ва жами сотувларнинг 20 фоизини ташкил этди.
Galaxy А15 нинг 4G версияси ҳам 5G ҳали ривожланмаган ҳудудларда машҳур бўлиб, кучли ўнталикка кирди. Бундан ташқари, 2018 йилдан бери биринчи марта Galaxy С серияси юқори ўнталикка кирди. Galaxy С24 сериясининг сотувлари асосан GenAI имкониятларига қаратилган кучли маркетинг туфайли ошди. Унинг машҳурлиги сунъий интеллект технологияларини, жумладан, ақлли қидирув, овозли хабарларни автоматик таржима қилиш ва матнни қайта ишлашнинг яхшиланган функцияларини жорий этиш билан боғлиқ бўлди.
Кучли ўнталикка iPhone 16 линиясининг иккита версияси ҳам кирди, аммо Pro Max ўзининг янгиланган техник хусусиятларига қарамай, сотувлар бўйича аввалги моделлардан ўзиб кета олмади. Оддий Pro версияси эса тўққизинчи ўринни эгаллади.
2024 йил флагман бозори учун катта ўзгаришларга бой бўлди. Илк марта энг кўп сотилган смартфонларнинг ярмидан кўпи сунъий интеллект билан жиҳозланди. Мутахассислар 2025 йилда энг кўп сотиладиган моделлар орасида сунъий интеллект қурилмалари сони ошишини кутмоқда.
Изоҳ (0)