Буюк Британия бош вазири Кей Стармер АҚШ ва Украина президентлари Дональд Трамп ҳамда Владимир Зеленский билан телефон орқали мулоқот қилди.
Бу ҳақда Британия бош вазирининг идораси маълум қилди.
Бош вазир телефон орқали президент Трамп ва президент Зеленский билан гаплашди. У Украинани сўзсиз қўллаб-қувватлашини маълум қилди. Шунингдек, Украина суверенитети ва хавфсизлигига асосланган мустаҳкам тинчлик йўлини топиш учун қўлидан келган барча ишни қилмоқда, дейилади баёнотда.
Владимир Зеленский ва Дональд Трампнинг Вашингтондаги учрашуви даҳанаки жангга айланганди. Украина президенти америкалик ҳамкасбини Россия томони билан муроса қилмасликка чақирди. Бунга жавобан Трамп Украина “оғир аҳволда” ва “қўлида кучли карталар” йўқлигини айтди.
Мулоқотга АҚШ вице-президенти Ж.Д.Венс ҳам аралашди. “Сиз бир марта бўлса ҳам раҳмат айтдингизми?” деб сўради у Зеленскийдан Америка ёрдамини писанда қилиб.
Трамп Украина аскарлари ақл бовар қилмайдиган жасорат кўрсатганини, аммо АҚШ жангларни тўхтатиб, пулни “қайта қуриш каби бошқа мақсадларда” ишлатмоқчи эканини таъкидлади.
Кейинроқ АҚШ президенти Truth ижтимоий тармоғида хабар эълон қилди ва унда Зеленский “тинчликка тайёр эмаслигини” таъкидлади.
Изоҳ (0)