Трампнинг маслаҳатчиси Украинадан “компенсация” талаб қилди

АҚШ президенти Дональд Трампнинг миллий хавфсизлик бўйича маслаҳатчиси Майкл Уолц Украина учун сарфланган пуллар эвазига “компенсация” талаб қилди.

Уолцнинг фикрича, Украина ва АҚШнинг инвестицион ҳамкорлиги Вашингтон томонидан кўрсатилаётган ҳарбий ёрдам харажатларини қоплашнинг энг мақбул йўли бўлиши мумкин.

Америка халқи харажатлар ўрнини қоплашга, бу урушга сарфлаган миллиардлари эвазига маълум бир компенсация олишга ҳақли, деди Уолц.

У Украина президенти Владимир Зеленский “Қўшма Штатлар билан фойдали қазилмаларни қазиб олиш бўйича келишув тузса, жуда оқилона иш қилган бўлиши”ни таъкидлади.

Bloomberg маълумотларига кўра, АҚШ ҳарбий ҳаракатлар тугаганидан сўнг Украина табиий бойликларига киришни таъминлаш бўйича бир томонлама келишув таклиф қилган. Бироқ Киевнинг дипломатик музокаралар жараёнида иштирок этишига кафолат берилмаган.

Бундан ташқари АҚШ Украина ҳудудида хавфсизликни таъминлаш учун ўз қўшинларини жойлаштириш ва бунинг эвазига камёб ерости бойликларининг 50 фоизига эгалик қилишни таклиф этган.

Хавфсизлик кафолатлари эвазига Украина ресурсларидан фойдаланиш

Трампнинг сўзларига кўра, у Зеленский билан Россия билан бўлажак тинчлик шартномасида хавфсизлик кафолатлари эвазига америкалик инвесторларга Украинадаги нодир металлар конлари ва газ конларига кириш ҳуқуқини бериш бўйича 500 миллион долларлик келишув тузмоқчи.

Ғарбга Украинада фойдали қазилмаларни қазиб олиш ҳуқуқини бериш ҳақида Зеленский 2024 йил кузида АҚШ президентлигига ўша пайтдаги номзодлар Дональд Трамп ва Камала Ҳаррисга тақдим этган “ғалаба режаси”да ҳам айтилган.

7 февраль куни Зеленский Reuters агентлигига берган интервьюсида АҚШ Украина табиий ресурсларини ўзлаштиришда устуворликка эга бўлишини, чунки “америкаликлар ҳаммадан кўпроқ ёрдам берганини” айтди. Бироқ у вазирларга АҚШга Украина минералларидан фойдаланишга рухсат берувчи ҳужжатни имзоламасликни буюрди.

“Менимча, у ҳали тайёр эмас. У бизни ва манфаатларимизни ҳимоя қилмайди. Украинага инвестициялар ҳақида гапириш мен учун жуда муҳим. Бу юридик жиҳатдан тўғри тузилиши керак. Агар барча масалалар ушбу хавфсизлик кафолатлари билан боғлиқ бўлса, бундан келадиган фойда қандай тақсимланиши ҳақида ўйлаш мумкин. Аммо ҳозирча ҳужжатда бу боғлиқликни кўрмаяпман”, деди у.

Президент АҚШнинг фойдали қазилмаларга кириши бўйича келишув Украина учун хавфсизлик кафолатлари билан боғлиқ бўлиши кераклигини таъкидлади.