Самарқанд шаҳрида 19 ёшли қиз ўзини 9-қаватдан ташлаб жонига қасд қилди. Ижтимоий тармоқларда ҳолат акс этган тасвирлар тарқалди.
Унда қиз кўп қаватли уй деразасида осилиб тургани, уни икки киши ушлаб қолишга урингани, бироқ қиз бунга қаршилик қилиб, типирчилагани, сўнг тушиб кетганини кўриш мумкин.
Бош прокуратура ахборот хизмати раҳбари Ҳаёт Шамсутдиновнинг “Дарё”га маълум қилишича, воқеа 19 февраль куни соат 17:00 атрофида содир бўлган. 2005 йилда туғилган С.М. Самарқанд шаҳрида жойлашган кўп қаватли уйнинг 9-қаватидаги хонадоннинг деразасидан ўзини пастга ташлаб жонига қасд қилган.
Ҳодиса жойи тергов тезкор гуруҳи томонидан кўздан кечирилиб, С.М.нинг ўлими сабабини аниқлаш мақсадида суд-тиббий экспертизаси тайинланган. Қизга тегишли бўлган уяли телефон аппарати олиб қўйилган ва иш учун аҳамиятли маълумотлар мавжудлигига аниқлик киритиш учун Киберхавфсизлик маркази ДУК томонидан компьютер техникавий экспертизаси тайинланган.
Ҳозирда мазкур ҳолат юзасидан Самарқанд шаҳар прокуратураси томонидан терговга қадар текширув ҳаракатлари олиб борилмоқда.
Марҳума Самарқанд шаҳрида жойлашган ISFT’да 1-босқич талабаси бўлган. У ҳали турмуш қурмаган бўлиб, бувиси билан яшаб келган.
2025 йил январида Қўқондаги талабалар турар жойида талаба қиз ўз жонига қасд қилгани ҳақида хабар берилган эди. Прокуратура суриштирув натижаларига кўра, мазкур ҳолат шахсий муаммолар сабабли содир бўлгани аниқланган ва жиноят иши қўзғатиш рад этилган.
Изоҳ (0)