Қўқон давлат педагогика институти талабалар турар жойининг 3-қаватидан ўзини пастга ташлаб, оғир тан жароҳати олган талаба қиз вафот этди.
Олий таълим, фан ва инновациялар вазирлигининг 25 январь куни эълон қилган ахборотида маълум қилинишича, воқеа 2024 йил 12 декабрь куни содир бўлган. Бир ойдан ортиқ муолажалар қилиниб, қизга тиббий ёрдам кўрсатилганига қарамасдан, унинг ҳаётини сақлаб қолишнинг иложи бўлмаган.
Прокуратура суриштирув натижаларига кўра, мазкур ҳолат шахсий муаммолар сабабли содир бўлгани аниқланган ва жиноят иши қўзғатиш рад этилган. Шунингдек, бундай ҳолатларнинг олдини олиш мақсадида суицидга қарши профилактика ишларини кучайтириш тавсия этилган.
“Марҳума қизнинг дафн маросими яқинлари иштирокида ўтказилди. Институт раҳбарияти оиласига моддий-маънавий ёрдам кўрсатиб, оғир кунларда улар билан бирга бўлди”, дейилади хабарда.
Вазирлик ҳозирда талабалар турар жойларида хавфсизликни таъминлаш учун махсус қоидалар жорий этилганини, кунлик назорат ва психологик кўмак йўлга қўйилганини қўшимча қилди.
Изоҳ (0)