ДХХ томонидан Тожикистон ва Қирғизистондан олиб келинган наркотик моддалар тўхтатиб қолинди (видео)

Давлат хавфсизлик хизмати ходимлари томонидан қўшни давлатлардан контрабанда йўли билан олиб келинган наркотик моддалар тўхтатиб қолинди.

Қайд этилишича, ДХХнинг Навоий ва Самарқанд вилоятлари бўйича бошқарма ходимлари ҳамкорлигида Нуробод туманида тезкор тадбир ўтказилган. Тадбирда Ургут туманида яшовчи 21 ёшли шахс Нуробод туманида истиқомат қилувчи 40 ёшли жиноий шериги билан тил бириктириб, Тожикистондан олиб келинган 2 килограмм 875 грамм опий моддасини 40,5 минг долларга сотган вақтида қўлга олинган.

Давлат хавфсизлик хизматининг Самарқанд вилояти бўйича бошқармаси ва Чегара қўшинлари ҳарбий хизматчилари томонидан ички ишлар органлари ходимларини жалб қилган ҳолда ўтказилган тезкор тадбирда, Самарқанд—Тошкент йўналишида ҳаракатланаётган Cobalt русумли автомашина Жомбой тумани ҳудудида тўхтатилиб, кўздан кечирилган. Унда йўловчи сифатида кетаётган, Ургут туманида яшовчи, 31 ва 28 ёшли икки нафар шахснинг ёнида 1 килограмм 616 грамм опий моддаси борлиги маълум бўлди.

Давлат хавфсизлик хизматининг Фарғона вилояти бўйича бошқармаси ходимлари томонидан ички ишлар органлари билан ҳамкорликда ўтказилган тезкор тадбирда эса Тошкент—Фарғона йўналишида ҳаракатланаётган Nexia русумли автомашина Наманган вилоятининг Поп туманидаги ЙПХ масканида тўхтатилган. Аммо тўхташ жараёнида автотранспорт воситасида йўловчи сифатида кетаётган, Бағдод туманида туғилган 37 ёшли шахс автомашина ойнасидан бир дона пакетни улоқтириб юборган.

Шундан сўнг, ушбу пакет холислар иштирокида текшириб кўрилганда, унда 1 килограмм 915 грамм гашиш моддаси борлиги маълум бўлган. Аниқланишича, мазкур фуқаро тожикистонлик наркокурьерлар томонидан Тошкент вилоятининг Бўка туманидаги хуфия жойга қолдириб кетилган ажал оғусини олиб кетаётган бўлган. У гиёҳвандлик воситасини 8 минг долларга сотиб олган.

Фарғона вилоятининг Олтиариқ туманида ўтказилган тезкор тадбирда бўлса Фарғона туманида яшовчи, муқаддам гиёҳвандлик воситалари савдоси билан боғлиқ жинояти учун судланган 34 ёшли шахс 770 грамм гашиш моддасини 7 минг долларга сотган вақтида қўлга олинган.

Терговга қадар текширув давомида, Қирғизистондан контрабанда йўли билан олиб келинган ушбу наркотик модданинг ҳақиқий эгаси Фарғона туманида яшовчи 24 ёшли фуқаро экани аниқланиб, у ҳам ушланган.

Ҳозирда ушбу шахсларнинг барчасига нисбатан Жиноят кодексининг тегишли моддалари билан жиноят ишлари қўзғатилиб, қамоқ эҳтиёт чораси қўлланилган.

Аввалроқ Фарғонада 17 ёшли бола яшаётган уйдан 30 килодан ортиқ наркотик моддалар топилгани тўғрисида хабар берилганди. Шунингдек, Самарқандда фуқаронинг уйидан салкам 32 кило марихуана топилган эди.