“Айритом” постида салкам 8 кг гиёҳвандлик моддаларини олиб киришга уринган юк машинаси тўхтатиб қолинди

Сурхондарё вилоятидаги “Айритом” чегара божхона постида юк машина кабинасига беркитилган гиёҳвандлик воситалари фош бўлди. Бу ҳақда вилояти божхона бошқармаси хабар берди.

Қайд этилишича, 3 июль куни соат 22:40 ларда Сурхондарё вилояти божхона бошқармаси ва ДХХ Сурхондарё вилояти бўйича бошқармаси ходимлари ҳамда Чегара қўшинлари ҳарбий хизматчилари томонидан ўзаро ҳамкорликда “Айритом” чегара божхона постининг кириш автопавильонига кириб келган юк автотранспорт воситаси белгиланган тартибда божхона назоратидан ўтказилган.

Натижада автотранспорт воситаси кабинасидаги хуфя жойга беркитилган 7 та сариқ рангли скотч билан ўралган ўрамлар борлиги маълум бўлган. Шундан сўнг, ушбу ўрамлар очилиб, махсус электрон тарозида ўлчаб кўрилганда учта ўрамда жами оғирлиги 3 килограмм бўлган опий ва тўртта ўрамда оғирлиги 4 килограмм 950 грамм бўлган гашиш гиёҳвандлик воситалари борлиги аниқланган.

Ҳозирда аниқланган ҳолат юзасидан терговга қадар текширув ҳаракатлари олиб борилмоқда.

Аввалроқ Фарғонада 17 ёшли бола яшаётган уйдан 30 килодан ортиқ наркотик моддалар топилгани тўғрисида хабар берилганди. Шунингдек, Самарқандда фуқаронинг уйидан салкам 32 кило марихуана топилган, Қирғизистонда Ўзбекистонга гиёҳванд моддалар ташиш билан шуғулланган шахс қўлга олинган эди.