Самарқанд вилоятининг Ургут туманида яшовчи шахслар Тожикистондан Ўзбекистонга гиёҳвандлик воситаси олиб киришда айбланиб, 16 йилга қамалди. Бу ҳақда ЎзА хабар берди.
Маълум қилинишича, фуқаро Д.А. ҳозирда жиноят ишининг унга нисбатан қисми алоҳида иш юритувига ажратиб олинган шахснинг топшириғига кўра, Тожикистоннинг Сўғд вилояти, Панжикент туманига бориб, наркосавдогардан аввалдан 100 минг долларга сотиб олишга келишилган 20 кг 747 грамм опий моддаси учун 20 минг доллар беради.
Сўнгра гиёҳвандлик воситасини ўзбек-тожик давлат чегарасига яқин бўлган жойга етказиб бериши кераклигини айтиб, Ўзбекистонга қайтади.
Орадан бир кун ўтиб, Д.А. ўзининг жиноий шериги бўлган Тожикистон фуқароси С.М. билан айланма йўллар орқали Панжикент туманига боради. Улар келишилган манзилга наркокурерлар етказиб берган 20 кг 747 грамм опий гиёҳвандлик воситасини қабул қилиб олиб, Ўзбекистон ҳудудига қайтиб ўтган вақтда ушланади.
Ҳолат юзасидан қўзғатилган жиноят иши доирасида олиб борилган тергов жараёнларида ушбу ноқонуний ишга Ургут туманида яшовчи Ж.Р. ҳам алоқадорлиги маълум бўлди.
Жиноят ишлари бўйича Ургут туман суди томонидан фуқаролар Д.А. ва С.М.лар Жиноят кодексининг 25,273 (жиноятга тайёргарлик кўриш ва жиноят содир этишга суиқасд қилиш; гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш), 223-(қонунга хилоф равишда чет элга чиқиш ёки Ўзбекистон Республикасига кириш) ва 246-моддаларида (контрабанда) назарда тутилган жиноятларни содир этганликда айбдор деб топилиб, уларнинг ҳар бири 16 йил 6 ой муддатга озодликдан маҳрум қилинди.
Шунингдек, фуқаро Ж.Р. Жиноят кодексининг 28,25,273 (жиноят иштирокчиларининг турлари; жиноятга тайёргарлик кўриш ва жиноят содир этишга суиқасд қилиш; гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) ва 28,246-моддалари (жиноят иштирокчиларининг турлари; контрабанда) билан айбдор деб топилиб, 16 йил муддатга озодликдан маҳрум қилинди.
Гиёҳванд моддалар савдоси
2024 йилнинг март ойи ўрталарида ДХХ Чегара қўшинлари ва Наманган вилояти бўйича бошқармаси ҳарбий хизматчилари томонидан олиб борилган тезкор-қидирув тадбирларида катта миқдордаги наркотик моддаларнинг ўзбек-қирғиз давлат чегарасидан ноқонуний ўтказилган ҳолати аниқланганди.
Шунингдек, Навоий вилоятида наркотик моддалар савдоси билан шуғулланувчи жиноий гуруҳ қўлга олингани, Тошкентда гиёҳванд моддалар савдоси билан шуғулланган талабалар ушлангани, шунингдек, Самарқанддаги тунги клубда 10 минг АҚШ доллари эвазига гиёҳванд модда сотишга уринганлар қўлга тушгани тўғрисида хабар берилганди.
Апрель ойи охирида Тошкент вилоятида наркокурерлик билан шуғулланган коллеж талабаси ушланганди.
Октябрь ойининг 10 куни давомида гиёҳвандлик воситаларини яшириш йўли билан (“закладка”) тарқатган ва шундай ноқонуний фаолият билан шуғулланган 32 нафар шахс ушланган.
Изоҳ (0)