Video: Afg‘onistondan 30 yil oldin Termizga olib kirilgan 13 tonnadan ortiq narkotik moddalar

Davlat bojxona qo‘mitasi 1992−1994-yillarda qo‘mitaning Surxondaryo viloyati boshqarmasi tomonidan qariyb 15,5 tonnadan ortiq giyohvandlik vositalari to‘xtatib qolingani aks etgan videotasvirlarni e’lon qildi.

Ma’lum qilinishicha, e’lon qilingan lavhalar o‘sha yillarda Davlat bojxona qo‘mitasining Surxondaryo viloyati boshqarmasiga rahbarlik qilgan Xoldor Sherovning shaxsiy arxividan olingan. Yuk ortilgan konteynerlar Afg‘oniston hududidan daryo porti orqali kemalarda O‘zbekistonga kirib kelgan.

1992-yil 8-oktabrda mayiz ortilgan konteyner ichida 13 tonnadan ortiq gashish yashirilgani aniqlangan. Ushbu giyohvandlik vositalarining qora bozordagi narxi o‘sha vaqtlarda 1,3 milliard dollarni tashkil qilgan.

“5-oktabr kuni bizning xodimlarimiz tekshirib ko‘rganida mayiz deb yozilgan konteynerda 2560 dona qutida hammasi bo‘lib, 32 tonna yuk borligi aniqlandi. Qutilar bir xil bo‘lishiga qaramasdan, 1305 dona qutida narkotik moddalar bor ekan. Qolganida 1255 qutida mayiz bor ekan”, — deydi videoda Xoldor Sherov.

1993-yil 16-fevralida esa yong‘oq ortilgan 2 ta temiryo‘l konteynerda 1167 kilogramm gashish yashirilgani fosh qilingan. Shu yili Surxondaryoda avtorefrijeratorning tom qismiga yashirilgan 1,2 tonna geroinning olib o‘tilishining oldi olingan.

Avvalroq Davlat xavfsizlik xizmatining Faxriylar kengashi raisi o‘rinbosari, O‘zbekistonda xizmat ko‘rsatgan yurist, iste’fodagi polkovnik Erkin Abdullayev 1992-yilda ancha shov-shuvga sabab bo‘lgan mazkur jinoyat ishi tafsiloti bilan bo‘lishgandi. Abdullayevning so‘zlariga ko‘ra, 1993-yilning yoziga kelib, mayizlar orasiga yashirilgan giyohvand moddalarga oid jinoiy ish bo‘yicha dastlabki tergov ishlari to‘xtatilgan. 1994-yilda xalqaro tashkilotlar va ommaviy axborot vositalar vakillari ishtirokida 13 tonna 50 kilogramm gashish yoqib yuborilgan. 1998-yilda AQSh M.Yusuf va M.Yunusni qo‘lga olgan. San-Fransisko shahrida bo‘ladigan sud jarayonida Erkin Abdullayev ham ishtirok etishi rejalashtirilgan edi. Ayrim mulohazalarga ko‘ra, u Amerikaga borolmagan.

“Darvoqe, amerikaliklar 1992-yilgi Termiz voqeasini ‘Ginness rekordlari kitobi’ga kiritish to‘g‘risida taqdimnoma kiritishga va’da bergan edi. Afsuski, bu quruq gap bo‘lib qolib ketgan”, — deya ta’kidlaydi u.