Тошкентдаги Шайхонтоҳур туманидаги хонадонлардан бирида яширин фаолият олиб борган нарколаборатория аниқланди.
Ушбу нарколаборатория Давлат хавфсизлик хизмати ходимлари томонидан Божхона қўмитаси ходимларини жалб қилган ҳолда ўтказилган махсус тадбир давомида фош этилган.
1986 ва 1988 йилларда туғилган, олий маълумотли икки киши логистика фаолияти билан шуғулланиш ниқоби остида Шайхонтоҳур туманидаги хонадонлардан бирида синтетик гиёҳвандлик воситаларини ишлаб чиқариш билан шуғулланган.
Кўздан кечириш жараёнида хонадонда жами 56 та ўрамда 26 килога яқин “Мефедрон” гиёҳвандлик воситаси, синтетик наркотик тайёрлашда фойдаланиладиган 400 килодан ортиқ суюқлик ва кукун кўринишидаги кимёвий моддалар ҳамда хом ашёлар, зарур асбоб-ускуналар борлиги аниқланиб, процессуал тартибда расмийлаштириб олинган.
Терговга қадар текширув давомида, гиёҳвандлик воситалари тайёрлашда фойдаланиладиган асбоб-ускуналар, хом ашё ва прекурсорлар хориждан келтирилгани ва тайёрланган наркотик моддаларнинг савдоси интернет тармоғи орқали амалга оширилгани аниқланган.
Тадбир давомида олинган наркотик моддалар тахминан 80 минг “доза”ни ташкил қилиши ва қора бозордаги қиймати 900 минг долларга тенглиги, шунингдек, нарколабораторияда сақланаётган 400 килодан ортиқ кимёвий моддалар ва хом ашёлар ёрдамида 50 килога яқин “Мефедрон” синтетик гиёҳвандлик воситаси ишлаб чиқариш мумкинлиги маълум бўлди.
Нарколаборатория аниқлангани ҳолати юзасидан Жиноят кодексининг 246 (контрабанда) ва 273-моддалари (гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) билан жиноят иши қўзғатилиб, ДХХ Тергов бошқармаси томонидан дастлабки тергов ҳаракатлари олиб борилмоқда.
Изоҳ (0)