Тошкент шаҳрида ДХХ ва ИИВ ходимлари томонидан ўтказилган тезкор тадбирда ноқонуний диний жамоат фош этилди.
Пойтахтдаги миллий таомлар ошхоналаридан бирида тунги вақтда божхона идораларининг 3 нафар ходими, Тошкент давлат шарқшунослик университети талабаси, технопарк директори ўринбосари, хусусий автомактаб директори ўринбосари, “Сергели-авто” бозорида савдо билан шуғулланувчи шахслар ва бошқалардан иборат жами 17 киши овқатланиш баҳонасида тўпланиб, турли хил диний адабиётлардан фойдаланган ҳолда ноқонуний жамоат кўринишидаги йиғинларни ташкил этган.
1976—2001 йиллар оралиғида туғилган мазкур шахсларнинг кўпчилиги асли наманганлик бўлиб, ҳозирда Тошкент шаҳрида истиқомат қилишади.
Аниқланишича, Божхона қўмитасининг бошқарма бошлиғи ўринбосари динга мутаассибларча берилиб, 2021 йилдан бошлаб мазкур норасмий диний дарсларни мунтазам равишда ташкил этиб келган. У ҳар бир дарс учун жамоат аъзоларидан маълум миқдорда пул йиғиб, устозларга берган.
Гуруҳ аъзолари 1989 йилда Наманган вилоятида туғилган ва ҳозирда Мисрда бўлган шахсдан Telegram орқали онлайн тарзда сабоқ олган. Шунингдек, уларга Тошкент давлат шарқшунослик университети талабаси ҳам оффлайн тарзда диний маърузалар ўтган.
Ҳозирда Божхона қўмитаси бошқарма бошлиғи ўринбосари, божхона органлари тезкор ходими ва катта инспектори, шунингдек, Тошкент давлат шарқшунослик университети талабаси ҳамда жамоат аъзоларига Миср давлатидан туриб, онлайн тарзда диний сабоқ берган фуқарога нисбатан Жиноят кодексининг 216-моддаси (жамоат бирлашмалари ёки диний ташкилотларни қонунга хилоф равишда тузиш) билан жиноят иши қўзғатилиб, тергов ҳаракатлари олиб борилмоқда.
Қолган фуқаролар жиноят иши доирасида гумонланувчи сифатида терговга жалб қилинган.
Бундан бир неча кун аввал Фарғона вилоятининг Бувайда туманида ҳужра шароитида диний сабоқ бериб келгани аниқланганди. 1991 йилда туғилган шахс 2022 йилда диний таълимотдан сабоқ бериш тартибини бузгани учун судланган бўлишига қарамасдан 1996 йилда туғилган турмуш ўртоғи билан биргаликда яшаш хонадонининг ертўла қисмида 30 нафар шахсга ҳужра шароитида диний сабоқ бериб келган.
Ертўлада таълим олаётганларнинг 23 нафари вояга етмаганлар бўлиб, улар орасида нафақат Фарғона вилояти, балки Сирдарё, Наманган, Сурхондарё вилоятларидан ота-оналари томонидан олиб келинганлари ҳам бор.
Изоҳ (0)