Гўё даҳшатни ҳис этгандек, машҳур хонанда уни хавотирга соладиган ягона инсон — бу унинг меросхўри эканлигини такрорлашдан чарчамасди.
2012 йил 11 февраль куни нуфузли “Гремми” мукофотини топшириш арафасида меҳмонхонанинг ювиниш хонасида 48 ёшли Уитни Хюстоннинг жасади топилади. У буюк қўшиқчи, биринчи даражали юлдуз бўлиб, унинг истеъдоди миллионлаб одамларга қувонч улашган эди.
Унинг фожиали ўлими ўша пайтда кўпчиликни ларзага солган, аммо фақат Уитнининг яқинларигина поп-юлдуз вафотининг асл сабабини билишарди. Сўнгги йилларда Уитни Хюстон доимий руҳий босим остида яшаган, овозини йўқотган, асабийлашган ва спиртли ичимликлар ҳамда тақиқланган дори воситаларига ружу қўйган.
Энг қиммат клиникаларда даволаниш ҳам, афсуски, вақтинчалик эди. Ёмон одатларга қарши курашдан, ижодий инқироздан ҳолдан тойган Уитнининг хаёлига тез-тез юрагини хавотирга соладиган ташвишли фикр келарди: ягона қизи Кристина ҳам онасининг тақдирини такрорламасмикан?
Шахсий ҳаёти
Юлдузнинг Бобби Браун билан никоҳи 14 йил давом этди, эҳтимол, унинг ўлимига ҳам шу сабаб бўлгандир. Қандай қилиб Уитни Хюстон қўпол, истеъдодсиз қўшиқчи ва қобилиятсиз актёр Бобби Браунни севиб қолган?
Хонанда Эдди Мерфи, Кевин Костнер каби машҳур актёрлар билан рол ўйнаган, улар мардлиги, бир сўзлилиги билан ажралиб турарди. Аммо Бобби Браун улардан фарқли ўлароқ, бундай фазилатларга эга эмасди. Аксинча, Уитни Хюстоннинг фикрича, у қўпол ва барча нарсани эзиб ўтишга мойил бўлган. Афсуски, у буни жуда кеч тушунади.
Қизига бўлган муносабати
Тўғрисини айтганда, Уитни Хюстон ғамхўр она бўлмаган, унинг шахсий ҳаёти омадсиз эрига боғлиқ бўлган.
Кристинанинг хотирасида машинада бўлган бир воқеа абадий муҳрланиб қолганди: 3 ёшлигида онасининг қучоғида ўтирганида, ота-онаси ўртасида жанжал бўлади. Дарғазаб отаси ҳайдовчига машинани тўхтатишни буюради. Кейин эса хотини ва боласини йўлнинг ўртасига ташлаб кетади.
Криситинанинг қандай муҳитда ўсиб улғайганини тасаввур қилиш қийин эмас. У отасидан қўрқарди ва ундан нафратланарди, онасига эса раҳми келарди. Аслида Уитни заиф аёл эди, ўзини ва қизини ҳимоя қилолмасди.
Ҳақиқатан ҳам ёшлигидан Кристина ота-онасининг ҳаёт тарзини ва хулқ-атворини ўзига сингдирганди. Миш-мишларга кўра, айнан Бобби Браун Уитни Хюстонни спиртли ичимликлар ва тақиқланган дориларга ўргатган. Бу ҳолатни кўриб улғайган қизи ҳам онасидан ўрнак олган.
Қизининг тақдири
Онасининг ўлимидан сўнг Кристина дунёдаги энг яқин инсонини йўқотганини бирданига тушунади. Аммо бундай ҳаётдан қутулиб кетолмайди, у ҳам онасининг йўлидан кетади.
Уитни Хюстон асраб олган ўгай акаси Ник Гордонга кўнгил қўяди. Аммо Ник унга қўл кўтаради ва Кристинанинг банк картасидаги пулларни ўғирлаб кетади — буларнинг ҳаммаси қизни хавфли чегара томон яқинлаштирарди.
Бувисининг неварасини тўғри йўлга солишга уриниши фойда бермайди. Кристина қўшиқчилик қобилиятини ривожлантирмай, ўша жойнинг ўзида унга нуқта қўяди. Унга энди нима бўлишинг фарқи йўқ эди, гўё онгли равишда ўлимига яқинлашарди.
2015 йил 31 январда уни ювиниш хонасида ҳушсиз ҳолда топишади. Қиз бошини сувга солган ҳолда ётган эди — 3 йил олдин онаси ҳам айнан шу ҳолатда топилганди. Кристина комага тушиб, олти ой ўтгач вафот этади.
Уитни Хюстон нимадан қўрққан бўлса, қизи айнан ўшани такрорлади. Бобби Кристина атиги 22 ёшда эди. Ҳаёти давомида у доим онасини соғинганини ва уни кутаётганини айтиб келарди.
Изоҳ (0)