Стинг, Эминем, Тимберлейк: Ўзини кинода синаб кўрган хонандалар

Хонанда ва мусиқачи сифатида машҳурликка эришганига қарамай, актёрлик борасидаги имкониятларни синаб кўриш мақсадида фильмларда суратга тушган юлдузлар ҳақида маълумот бериб ўтамиз.

Алиша Киз «Энаганинг кундалиги»

2001 йилда илк альбомини тақдим қилган Алишанинг машҳурлиги шундан кейин тобора ортиб борган. 2006 йилга келиб аллақачон иккита альбомли тўкис ва тўққизта «Гремми» мукофотининг эгаси бўлиб улгурган. Шундан кейин «Энаганинг кундалиги» фильмида суратга тушишга таклиф қилинган. Бош қаҳрамонни Скарлетт Йоханссон гавдалантирган картинада Алиша, унинг энг яқин дугонаси ролини ижро қилган. Шунингдек, фильмда Крис Эванс, Лора Линни ва Пол Жаматтини ҳам кўриш мумкин.

Ленни Кравис «Ҳаёт мамот ўйинлари»

90 йилларнинг охири 2000 йиллар бошида машҳурликка эришган Ленни 2009 йилда «Хазина» номли фильмда суратга тушган ва шу туфайли бир нечта мукофотларга номзоди қўйилган. Қолаверса, айнан мазкур ролидан кейин Гери Рот уни «Ҳаёт мамот ўйинлари»да иштирок этишга таклиф қилган. Натижада у мухлислар учун севимли бўлган Синна ролини гавдалантирган. Унинг образи борасида режиссёр, Ив Сен Лоран ва Том Форднинг образларидан илҳомланган.

Жастин Тимберлейк «Мўъжиза чархпалаги»

Жастин 20 йиллик актёрлик карьераси давомида 22 та картинада рол ижро қилиб улгурган. Шу сабаб ҳам уни шунчаки хонанда эмас, балки истеъдодли актёр сифатида ҳам яхши билишади. У Вуди Алленнинг «Мўъжиза чархпалаги» фильмида Кейт Уинслет, Жеймс Белушу ва Жуно Темпл билан биргаликда суратга тушган. Жастин мазкур картинада қутқарувчи Микки ролини ижро қилган.

Селена Гомес «Нью-Йоркдаги ёмғирли кун»

«Вейверли-Плейслик афсунгарлар» сериалидаги ижроси сабаб машҳурликка эришган Селена овози яхши бўлгани учун турли фильмлар учун қўшиқ куйлаган. Бу эса тўлиқ мусиқий карьерасини бошлашига сабаб бўлган. Хонанда сифатида самарали ижро қилишига қарамай, онда-сонда актрисалик қилишни ҳам канда қилмайди. Масалан, Вуди Алленнинг «Нью-Йоркдаги ёмғирли кун» фильмида у Тимоти Шалам билан бирга рол ижро қилган.

Эминем «Саккизинчи мил»

Асл исми Маршалл Брюс Метерс III бўлган рэпер карьераси давомида атиги бир марта ўзини актёр сифатида синаб кўрган. 2000 йилда унинг ижросидаги «Саккизинчи мил» фильми экран юзини кўрган. Хонанда унда мусиқа оламидаги можаролар авж олган вақтда ўз йўлини топишга уринаётган рэпер ролида намоён бўлган. Шундан кейин «МТВ Music Awards» мукофотини бир неча марта қўлга киритган Эминемнинг фильм учун куйлаган «Lose yourself” қўшиғи «Оскар» олишига сабабчи бўлган.

Мик Жаггер «Талончилик санъати»

«The Rolling Stones» солисти Мик Жаггер 2009 йилда «Талончилик санъати» номли фильмда Элизабет Дебик ва Дональд Сазерленд билан бирга суратга тушган. Жаггер санъатдан фойдаланиб йирик талончиликни амалга оширмоқчи бўлган арт-дилер ролини ижро қилган.

Уитни Хьюстон «Тансоқчи»

Уитни Хьюстон суратга тушган «Тансоқчи» фильми ва унга куйланган «I will always love you» қўшиғининг қанчалик машҳур эканини билмайдиган одам бўлмаса керак. Режиссёр Мик Жаксон томонидан тасвирга олинган фильмда хонанда Кевин Костнер билан бирга суратга тушган.

Стинг «Карта, пул ва икки ўқ»

«Shape of my heart» номли қўшиғи қалблардан жой олиб улгурган Стинг, 17 марта «Гремми» мукофотига номзод бўлган, «Олтин Глобус» ва «Эмми» мукофотини қўлга киритган. У Гай Ричининг фильмида суратга тушиб ўзини, актёрлик бобида ҳам чакки эмаслигини исботлаган. Унинг лойиҳада иштирок этишга берган розилигидан кейин бошқа актёрлар ҳам рол ижро қилишга дарҳол розилик бера бошлаган.

Жаред Лето «Даллас харидорлар клуби»

2021 йил 50 ёшни қаршилаган Жаред Лето «Thirty Seconds to Mars» гуруҳидаги муваффақиятли карьерасидан ташқари, актёр сифатида ҳам эътироф этилган. Ижросидаги «Даллас харидорлар клуби» фильми 2014 йилда «Оскар» ва «Олтин Глобус»га лойиқ топилган.