Туркиянинг Болу провинциясидаги Гранд Картал меҳмонхонасида юз берган ёнғин оқибатида 79 киши ҳалок бўлганди. Меҳмонхона эгаси фожианинг бутун жавобгарлигини ходимларга юклади. Бу ҳақда Карар хабар берди.
Ёнғин иши бўйича суд тергови давом этмоқда. Ҳолат юзасидан тўққиз киши, жумладан, меҳмонхона эгаси ҳам қўлга олинган. Ҳозирда меҳмонхона муҳрланган, ҳукумат уни бузиб ташлашга қарор қилган. Ўтказилган экспертиза натижасида бинонинг конструкциялари жиддий шикастлангани аниқланган.
“Болуда содир бўлган фожиадан сўнг қамоққа олинган меҳмонхона эгаси Холит Эргул ўз баёнотида барча масъулиятни ходимлар ва маслаҳатчиларга юклаган. У, айниқса, бош ошпаз, ошхона ходимлари, меҳмонхона электриги ва қўриқчиларни айблаган”, дейилади хабарда.
Ёнғин 21 январга ўтар кечаси Болу провинциясидаги 12 қаватли ёғоч меҳмонхонада содир бўлди. Губернатор Абдулазиз Айдин ёнғин тўртинчи қаватдаги ресторан зонасида содир бўлгани ва бутун бинога тарқалганини айтган. Ўша пайтда меҳмонхонада 234 нафар киши бўлган.
CNN турк нашрининг хабар беришича, фавқулодда вазият куни ўқувчиларнинг таътиллари туфайли меҳмонхона 80-90 фоизга тўлган. Ёнғин сабаби ҳозирча аниқланмаган, тергов олиб борилмоқда, 22 январь Туркияда мотам куни деб эълон қилинган.
Шавкат Мирзиёев туркиялик ҳамкасби Ражаб Тоййиб Эрдўғонга тоғ-чанғи курортидаги ёнғин оқибатида кўплаб инсонлар қурбон бўлгани ва жиддий жароҳат олгани муносабати билан ҳамдардлик йўллади. Қардош Туркия етакчиси ва халқига чуқур таъзия изҳор этиб, давлат раҳбари марҳумларнинг оила аъзолари ва яқинларига сабр-тоқат ва бардамлик, жабрланганлар тез фурсатда соғайиб кетишини тилади.
Изоҳ (0)