Буюк Британия Миллий хавфсизлик хизматининг (MI-5) собиқ раҳбари Стелла Римингтон 90 ёшида оламдан ўтди. Бу ҳақда Британиянинг Sky News телеканали хабар бермоқда.
Римингтон 1992 йилдан 1996 йилгача контрразведка учун масъул бўлган MI-5 га раҳбарлик қилган. У MI-5 бошлиғи лавозимини эгаллаган биринчи аёл ва номи расман ошкор этилган биринчи хизмат раҳбари бўлган.
Стелла Римингтон 1935 йилда Лондонда туғилган. У ўз фаолиятини Ҳиндистондаги MI-5 да бошлаган, у ерга дипломатик лавозимга тайинланган эри билан бирга кўчиб борган. Дастлаб, Римингтон ярим ставкада котиба-машинист бўлиб ишлаган, 1969 йилда эр-хотин Буюк Британияга қайтгач эса, MI-5 нинг тўлақонли ходимига айланган.
1991 йилда Римингтон MI-5 бош директори ўринбосари лавозимига кўтарилган, бир йил ўтиб, 1992 йилда эса бош директор этиб тайинланган. У бу лавозимни эгаллаган биринчи аёл ҳисобланади.
“Мен биринчи аёл бош директор бўлганимдан ва хизматим даврида MI-5 ўзгариб, эски услубдаги ёпиқ ташкилот бўлишдан чиқиб кетганидан фахрланаман”, деб айтган эди Римингтон 2011 йилги интервьюсида.
1996 йилда истеъфога чиққанидан сўнг, Римингтон Опен Сеcрет номли хотиралари ва разведкачи Лиз Карлайл ҳақидаги саккизта жосуслик романларини нашр этди. Улар 2004 йилдан 2014 йилгача чоп этилган. Sky News хабарига кўра, Жеймс Бонд ҳақидаги фильмлар туркумидаги “М” персонажи Стелла Римингтон образи асосида яратилган.
Изоҳ (0)