БМТнинг денгизга чиқиш имкони бўлмаган ривожланаётган мамлакатлар бўйича учинчи конференцияси доирасида Ўзбекистон президенти Шавкат Мирзиёев ва Туркманистон президенти Сердар Бердимуҳамедовнинг учрашуви бўлиб ўтди. Бу ҳақда 5 август куни Президент матбуот хизмати хабар берди.
Туркманистондаги учрашувда Шавкат Мирзиёев Сердар Бердимуҳамедовни “Халқаро тинчлик ва ишонч йили”да БМТнинг глобал конференцияси юқори савияда ўтказилгани билан самимий қутлаган. Туркманистоннинг юксак давлат мукофоти — “Ҳамкорликни ривожлантиришга қўшган ҳиссаси учун” ордени билан тақдирлагани учун миннатдорлик билдирган.
Мулоқотда бўлажак олий даражадаги тадбирларга тайёргарлик доирасида Ўзбекистон—Туркманистон дўстлик, яхши қўшничилик ва стратегик шериклик муносабатларини янада кенгайтиришнинг долзарб масалалари кўриб чиқилган.
Ўзаро товар айирбошлаш изчил ортиб, саноат, энергетика, транспорт, қишлоқ ва сув хўжалиги соҳаларида кооперация кенгайиб бораётгани қайд этилган.
Фаол ҳудудлараро ва гуманитар алмашинувлар давом этмоқда. Жорий йилда ўтказилиши режалаштирилган ҳукуматлараро комиссиялар йиғилишлари, Ишбилармонлар кенгаши, ҳудудлар форуми ва қатор маданий тадбирлар натижадорлигини таъминлаш муҳимлиги таъкидланди. Минтақавий кун тартиби юзасидан ҳам фикр алмашилди, олий даражадаги учрашувлар режаси кўриб чиқилди, дейилади манбада.
Аввалроқ Шавкат Мирзиёев, Туркман халқ маслаҳати раиси Гурбангули Бердимуҳамедов ва Озарбайжон бош вазири Али Асадовнинг уч томонлама учрашуви бўлиб ўтгани хабар қилинганди.
БМТ конференциясида хорижий давлатлар ва ҳукуматлари раҳбарлари, халқаро ва минтақавий ташкилотлар раҳбарлари иштирок этиб, қатор масалаларни муҳокама қилди.
Анжуманда сўзлаган нутқида президент Шавкат Мирзиёев Марказий Осиёда транспорт-логистика тармоқларини ривожлантириш масаласига тўхталди.
Жаҳон банки маълумотларига кўра, транспорт харажатларининг катталиги ва транзит тизимининг беқарорлиги туфайли Марказий Осиё минтақаси ҳар йили ялпи ички маҳсулотнинг икки фоизигача йўқотмоқда. Логистика харажатлари маҳсулотлар умумий нархида 60 фоизгача етмоқда. Бу рақам жаҳондаги ўртача кўрсаткичлардан бир неча баробар юқоридир. Шу боис, ишончли янги транзит йўлаклари ва логистика инфратузилмасини ривожлантириш Марказий Осиёда барқарор тараққиётнинг муҳим омилига айланмоқда.
Президент нутқида Ўзбекистон—Афғонистон—Покистон темирйўлини қуришни тезлаштириш, уни қурилаётган Хитой—Қирғизистон—Ўзбекистон темирйўл магистрали билан боғлаш муҳимлиги ҳақида ҳам сўз борган. Бу минтақада янги савдо-иқтисодий макон ва барқарор транспорт инфратузилмасини шакллантириш учун катта имконият яратиши таъкидланган. Шунингдек, Ўрта йўлакни ривожлантиришга устувор аҳамият қаратилиши айтилган.
Изоҳ (0)