Ўзбекистонда ёзнинг жазирама иссиғи — айниқса июль—август ойларидаги +40°C атрофидаги ҳарорат аёлларни кўпроқ очиқ рангли, енгил матоли, ҳаво ўтказувчи либослар танлашга ундайди. Instagram саҳифалари орқали миллионлаб обуначиларга эга блогер аёл-қизлар ёзги образлар орқали ўз услубини намоён этмоқда. Зебо Раҳимова, Шаҳло Алижонова, Нозанин Ғаффорова, Умида Абдуғаффорова (Бонамур), Шаҳризода Мадаминова, Юнетта Акопян ва Ҳуснора Шодиева сингари таниқли аёлларнинг ёзги либослари ва улар танлаган мато, ранг ҳамда услубни кўриб чиқамиз.
Жазирамада ҳам замонавийликни йўқотмаган Ҳуснора Шодиева
Ҳуснора ёз учун эркин, нафис ва саёҳатбоп услуб танлаган. Маълум қилишича, у Тошкентда бутун ёз давомида атиги 10 кун бўлган.
Ёзги гардеробида у очиқ ранглар, енгил матолар ва минималистик деталларга устунлик беради. Оқ, қаймоқранг, сариқ ва қизил каби ёрқин ранглар унинг бу йилги асосий танловига айланган. Услубда эса соддалик билан бирга чиройли силуэт ва нафис урғулар сезилади. Кроп топ, узун юбка, бандана, кўзойнак, енгил сандаллар — буларнинг бари Ҳусноранинг бу ёзда яратган “саёҳатчи модел” образини мустаҳкамлаб турибди.
Соддаликни танловчи Шаҳло Алижонова
Инстаблогер Шаҳло Алижонованинг ёзги образларида оч ранглар ва енгиллик устун. У одатда табиий, ҳаво ўтказувчи матолардан тикилган либосларни танлайди — масалан, пахта ёки вискоза. Бел қисми тор, этаги эса кенг шаклда бўлган либослар унинг услубига нафислик бағишлайди. Минимал пардоз, соддалиги билан ажралиб турувчи аксессуарлар ва қулай пойабзаллар орқали Шаҳло ўзининг ёзги образларини қулайлик ва замонавийлик билан уйғунлаштирган.
Инстаблогер Юнетта Акопян ёзнинг иссиқ кунларида ҳам нафис образини сақлаб қолган
Юнетта Акопян бу ёзда классик силуэтлар ва замонавий деталлар уйғунлигини намойиш этмоқда. +40 °C иссиқда ҳам у ўз образида нафислик ва қулайликни ушлаб қолишга эришган. Унинг ёзги луклари орасида оқ, қизил, оч пушти каби туслар кўзга ташланади. Енгил блузкалар ва атлас матосидан тикилган кўйлаклар Юнеттанинг образига ўзига хос ҳашамат берган. У ёрқин пардоз, майда аксессуарлар ва силлиқ соч турмаги билан ҳарорат юқорилигига қарамай, ўзининг ёқрин замонавий услубини сақлаб қолган.
Инстаблогер Нозанин Ғаффорова минимализмга содиқ
Нозанин Ғаффорова бу ёзда минимализм — бу ҳашамат деган тамойилга содиқ қолган. Енгил шифон ва силлиқ вискоза матоларидан тикилган, соддалиги билан ажралиб турувчи либослар унинг танлови бўлган. У лукъларида оқ, қора, яшил каби рангларни мураккаб силуэтларсиз кўрсатмоқда. Ялтироқ бўлмаган аккессуарлар ва сандаллар унинг образига бир оз жиддийлик қўшади. Аксессуарлардан нафис заргарлик буюмлари унинг умумий кўринишни бирлаштирган.
Блогер Умида Абдуғаффорова нафислик ва замонавийликни уйғунлаштира олади
Аёллар кийим дўкони асосчиси сифатида Умида Абдуғаффорова — Instagram’да Бонамур номи билан танилган блогернинг ёзги образлари енгил креп, сатин ва шифон матоларидан тикилган элегант либослар, А-фасонли кўйлаклар, қийиқ енгли миди кўйлаклар ва оверсайз сатин костюмлардан иборат. Рангларда эса оқ, қаймоқранг, тўқ пушти ва ферузаранг етакчи. Унинг ҳар бир образида нафислик ва замонавийлик уйғунлаштирилган.
Шаҳризода Мадаминованинг ёзги образларида профессионаллик, назокат ва замонавийлик устун
Модель, актриса ва моделлик мактаби асосчиси Шаҳризода образларида профессионаллик ва эстетикани бирлаштиради. У ёзда ҳаракатга қулай, белни ажратиб кўрсатувчи либослар, гул принтли кўйлакларни танлайди. Шаҳризода кўпинча силлиқ материаллардан тикилган, силуэтни таъкидловчи либосларни кияди. Аксессуарлари эса керагидан ортиқ эмас — баланд пошнали оёқ кийимлар ва нозик тақинчоқлар билан чекланади.
Ҳар қандай об-ҳавода қулайликни афзал кўрувчи Зебинисо Раҳимова
Миллионлаб обуначиларга эга инстаблогер Зебинисо Раҳимованинг ёзги кийим услуби содда, қулай ва айни вақтда жонли кайфиятга эга. У, асосан, пахта, вискоза ёки трикотаж каби енгил, тана “нафас оладиган” матолардан тикилган либосларни танлайди. У танлаган ранглар орасида кўпинча оч пушти, оловранг ва бошқа оч туслар кўзга ташланади — булар эса ёзги об-ҳавога мос ранглардир.
Унинг образлари кўпроқ оддий кўйлаклар, енгил пойабзаллар ҳамда табассум билан тўлдирилган. Бу соддалик Зебонинг стилига самимийлик ва оммага яқинлик бағишлайди.
Изоҳ (0)