Ўзбекистондаги оилаларда камбағаллик юзага келишига атрофдаги муҳит кучли таъсир қилмоқда. Бу ҳақда 27 август куни кўп ўлчовли камбағалликка доир форум очилишида Ижтимоий ҳимоя миллий агентлиги директори Мансурбек Оллоёров маълум қилди, дея хабар берди “Дарё” мухбири.
Мансурбек Оллоёровнинг таъкидлашича, камбағаллик фақат пул етишмовчилиги эмас, балки кўп ўлчовлидир.
“Аксарият ҳолларда камбағалликка оила атрофидаги муҳит таъсир қилмоқда. Масалан, айрим маҳаллаларда камбағал оилалар улуши 30 фоиздан юқори. Демак, бу ҳудудларда камбағалликни самарали қисқартириш дастурлари айнан муҳит омиллари билан ишлашга қаратилиши керак. Шу сабабли кўп ўлчовли камбағаллик индексини маҳалла ва оилаларда аниқлашда қўллаш бўйича изланишлар олиб бормоқдамиз”, деди агентлик раҳбари.
-TVbWqrq0.jpg)
Мансурбек Оллоёров мамлакатдаги вазиятни таҳлил қиларкан, агентликка моддий ёрдам сўраб ойига 400 мингдан ортиқ мурожаат келаётганини айтди. Шуни инобатга олиб, камбағал оилалар билан индивидуал ишлаш тизими жорий этилиши устида ишланмоқда.
“Ижтимоий ҳимоя ягона реестрида рўйхатдан ўтган 1 миллиондан ортиқ оила давлат томонидан моддий ёрдам олмоқда. Ўзбекистонда камбағал бўлмаган оилаларнинг ҳар учтадан бири олий маълумотга эга. Камбағал фуқароларда эса бу кўрсаткич ўндан бир кишига тўғри келмоқда. Камбағал оилалар даромадининг 30 фоиздан ортиғи соғлиқни сақлаш хизматларига сарфланадиган бўлса, камбағал бўлмаган оилаларда бу кўрсаткич 9 фоиздир. Оддий оилаларнинг 14 фоизида чорва бўлса, камбағал оилаларда 2 фоизни ташкил этади”, дея маълум қилди агентлик масъули.
Мансурбек Оллоёровга кўра, охирги уч йилда молиявий жиҳатдан оғир вазиятда бўлган уч миллион нафардан ортиқ аҳоли шароити яхшиланган. Натижада республика бўйича камбағаллик даражаси 2021 йилда 17 фоиздан 2023 йилги 11 фоизга туширилган. Келгуси уч йилда бу кўрсаткични 7 фоизгача пасайтириш мақсад қилинган.
Эслатиб ўтамиз, 27–29 август кунлари Ўзбекистонда илк бор Кўп ўлчовли камбағаллик бўйича ҳамкорлик халқаро тармоғининг йиғилиши бўлиб ўтмоқда. Тадбирда 63 та мамлакат ва 30 дан ортиқ халқаро ташкилот вакиллари, хусусан сиёсатчилар ҳамда иқтисодчилар иштирок этяпти. Мулоқотларда камбағалликка қарши бирдамликда, самаралироқ курашиш масаласи муҳокама қилинмоқда.
Йиғилиш очилишида Ўзбекистонда БМТ Тараққиёт дастури ёрдамида кўп ўлчовли камбағаллик индекси жорий этилаётгани айтилган. Ҳозирда мазкур йўналишда Статистика агентлиги 16 мингта уй-хўжаликларида сўровнома ўтказмоқда. Натижалар илк марта 2025 йилда эълон қилинади.
Изоҳ (0)