Бугун, 27 август куни Тошкент шаҳрида кўп ўлчовли камбағаллик бўйича ҳамкорлик халқаро тармоғининг 9-йиғилиши бўлиб ўтди. Бу ҳақда “Дарё” мухбири хабар берди.
Уч кун давом этадиган форумда 63 та мамлакат ва 30 дан зиёд халқаро ташкилотлар вакиллари, сиёсатчилар, экспертлар иштирок этмоқда.
Тадбирда Ўзбекистонда БМТ Тараққиёт дастури ёрдамида кўп ўлчовли камбағаллик индекси жорий этилаётгани айтилди. Иқтисодий тадқиқотлар ва ислоҳотлар маркази директори Обид Ҳакимовнинг таъкидлашича, янги тизим камбағалликни чуқур тадқиқ этиш билан бирга, қатор соҳалардаги муаммоларга ечим топишга ҳам йўл очади.
![](/static/2024/08/27/Hilton_27_08.00_10_12_06.Still004-65NgdO8b.jpg)
“Камбағалликнинг энг оддий ўлчови — монетар камбағаллик. Бунда даромадингиз маълум суммадан кам бўлса, сиз камбағал ҳисобланасиз. Кўп ўлчовли камбағалликда эса одамнинг қайси имкониятлардан маҳрумлиги аниқланади. Хусусан, таълим, соғлиқни сақлаш хизматларидан фойдалана оладими, яшаш шароити қандайлиги ўрганилади. Ўзбекистонда шу йўналишда пилот лойиҳалар қилинди. Ҳозир Статистика агентлиги 16 мингта уй хўжаликларида сўровнома ўтказмоқда. Натижалар 2025 йилда эълон қилинади. Кўп ўлчовли камбағаллик индексининг афзаллик тарафи—бир одамнинг яшаш шароити турли томондан қандай ўзгараётганини баҳолайди. У давлатнинг қатор соҳаларда бажараётган ишлари самарасини ўлчаш имконини ҳам беради”, деди марказ раҳбари.
![](/static/2024/08/27/Hilton_27_08.01_31_46_21.Still007-uFRydFcY.jpg)
Мулоқотда сўнгги уч йил давомида Ўзбекистондаги молиявий кўмакка муҳтож 3 миллион аҳолининг турмуш шароити яхшилангани айтилди. Бунинг натижасида мамлакатдаги монетар камбағаллик даражаси 17 фоиздан 11 фоизга камайган. Яқин келажакда бу кўрсаткични 7 фоизгача қисқартириш режалаштирилган.
![](/static/2024/08/27/Hilton_27_08.01_28_29_15.Still006-43ZVXH4l.jpg)
Форумда мутахассислар ўз юртида кўп ўлчовли камбағаллик индекси қандай ишлаётгани тўғрисида фикр алмашмоқда. Ўзбекистонда янги тизимни йўлга қўйишда нималарга эътибор қаратиш муҳимлиги бўйича таклифлар билдириляпти. Форумнинг учинчи кунида иштирокчилар Самарқанд шаҳрида бўлиши ва ҳудуддаги маҳаллабай ишлаш тизими билан таништирилиши кутилмоқда.
![](/static/2024/08/27/Hilton_27_08.01_27_35_46.Still005-DDItXYA_.jpg)
Маълумот учун, 2010 йилда Оксфорд камбағалликка қарши курашиш ва инсон капиталини ривожлантириш ташаббуси (ОPHI) ва БМТ Тараққиёт дастури томонидан ишлаб чиқилган Глобал кўп ўлчовли камбағаллик индекси (MPI) жорий этилди. Бунда камбағалликни батафсил баҳолаш учун соғлиқни сақлаш, таълим ва турмуш даражаси кўрсаткичларидан фойдаланилади.
2013 йилда эса камбағалликка қарши курашишда бирлашиш ва тажриба алмашиш мақсадида 63 та мамлакат ва 30 дан зиёд халқаро ташкилотлар иштирокида Кўп ўлчовли камбағаллик бўйича глобал ҳамкорлик тармоғи ташкил этилган. Тармоқ доирасида ҳар йили турли давлатларда учрашувлар ўтказилади.
Изоҳ (0)