Тожикистонда камбағаллик даражаси 1999 йилдаги 83 фоиздан 2023 йилда 21,2 фоизгача пасайди. Бу ҳақда мамлакат президенти Эмомали Раҳмон мустақилликнинг 33 йиллиги муносабати билан йўллаган табрикномасида маълум қилди.
Эмомали Раҳмон ҳукуматга қашшоқлик даражасини пасайтириш динамикасини сақлаб қолиш ва келгуси етти йил ичида 10 фоизлик кўрсаткичга эришиш вазифаси юклатилганини айтди. Бу 2030 йилгача мўлжалланган Миллий тараққиёт стратегиясининг вазифаларидан биридир.
Давлат мустақиллиги давридаги асосий саъй-ҳаракатлар тўртта миллий стратегик мақсад доирасида жамланган — мамлакатнинг энергетика мустақиллигини таъминлаш, уни коммуникация боши берк кўчаларидан олиб чиқиш, озиқ-овқат хавфсизлигини таъминлаш ва мамлакатни жадал саноатлаштириш.
Ўзбекистонда камбағаллик даражаси қандай?
Январь ойида Иқтисодий тадқиқотлар ва ислоҳотлар маркази ва Статистика агентлиги томонидан 2023 йил учун Ўзбекистонда камбағаллик даражаси таҳлил қилинди. Унга кўра, Статистика агентлиги томонидан ўтказилган 16 мингта уй хўжаликлари кузатувларига асосан мамлакатда камбағаллик даражаси 2023 йил якунида 11 фоизгача пасайди. 2022 йилга нисбатан 3,1 фоизга камбағаллик қисқарган. Ўшанда камбағаллик даражаси 14 фоизни ташкил этган. Жараён Жаҳон банки экспертлари томонидан текширилган.
Изоҳ (0)