O‘zbekistonda kambag‘allik darajasi 2024-yil yakuniga ko‘ra 11 foizdan 8,9 foizga kamaydi. Bu haqda Kambag‘allikni qisqartirish va bandlik vazirligi xabar bermoqda.
Qayde etilishicha, 2024-yil yakunida kambag‘allik darajasi 3,3 million kishiga yoki 2023-yilga nisbatan 719 mingga kamaygan. Bu natija Jahon banki bilan hamkorlikda olib borilgan tadqiqotlar asosida aniqlangan.
Kambag‘allik darajasi eng yuqori pasayishlar:
- Buxoro viloyatida — 11,8 foizdan 8,7 foizgacha;
- Samarqand viloyatida — 10,5 foizdan 7,5 foizgacha;
- Namangan viloyatida — 10,4 foizdan 7,6 foizgacha;
- Qoraqalpog‘iston Respublikasida — 13,6 foizdan 10,8 foizgacha qayd etildi.
2024-yilda aholi bandligini taʼminlash, tadbirkorlikka jalb qilish, tomorqa va dehqonchilik uchun ajratilgan yer maydonlaridan foydalanish samaradorligini oshirish bo‘yicha ko‘rilgan choralar mamlakatda kambag‘allik darajasini pasaytirishga katta hissa qo‘shdi.
Buning natijasida 2024-yilda aholining real daromadi 10,7 foizga o‘sib, jon boshiga oyiga o‘rtacha 2,1 mln so‘mdan to‘g‘ri keldi (yil boshida – 1,7 mln so‘m).
Jumladan, aholi daromadlari tarkibida:
- ish haqi – 42,6 foiz (2023-yilda – 41,9 foiz);
- tadbirkorlikdan daromadlar – 22,9 foiz (21,4 foiz);
- pensiya, ijtimoiy yordam va subsidiyalar – 18,2 foiz (18,9 foiz);
- qishloq xo‘jaligi va tomorqadan daromadlar – 10,7 foiz (9,8 foiz);
- xorijdan pul o‘tkazmalar – 2,0 foiz (3,1 foiz);
- boshqa daromadlar – 3,6 foiz (4,9 foiz)ni tashkil etdi.
Aholining ish haqidan daromadlari esa 2023-yilga nisbatan 12,9 foizga ko‘paydi.
2023-yil yakunida kambag‘allik darajasi 11 foizgacha pasaygandi. 2022-yil natijalarida kambag‘allik darajasi 14 foizni tashkil etgan. Shavkat Mirziyoyev 2024-yil sentyabrida Osiyo infratuzilmaviy investitsiyalar banki Boshqaruvchilari kengashining to‘qqizinchi yillik yig‘ilishida so‘zlagan nutqida to‘rt yil ichida O‘zbekistondagi kambag‘allik darajasini 23 foizdan 11 foizga tushirishga erishilgani ta’kidlab, 2024-yilda bu ko‘rsatkichni 9 foizgacha, 2030-yilga qadar esa 2 barobar pasaytirish maqsad qilinganini aytgandi.
O‘zbekistonda kambag‘allikni qisqartirish
Shavkat Mirziyoyev mahallalarda kambag‘allikni qisqartirish, kambag‘al oilalar bilan ishlash tizimini yangi bosqichga olib chiqish chora-tadbirlari yuzasidan 2024-yilning sentyabrida o‘tkazgan videoselektor yig‘ilishida O‘zbekistonda kambag‘allikni qisqartirish umummilliy harakatga aylanishini, “Kambag‘allikdan farovonlik sari” dasturi tayyorlanayotganini aytgandi. Dastur shu yilning o‘zida 500 ming, 2025-yilda yana 1 million kishini kambag‘allikdan chiqarishga qaratilgan.
24-sentyabr kuni “Kambag‘allikni qisqartirish va aholi turmush farovonligini oshirish borasidagi chora-tadbirlarni yangi bosqichga olib chiqish to‘g‘risida”gi prezident farmoni qabul qilindi. Hujjat bilan “Kambag‘allikdan farovonlik sari” dasturi amalga oshirilishi belgilandi.
Shavkat Mirziyoyev mahallalarda kambag‘allikni qisqartirish, kambag‘al oilalar bilan ishlash tizimini yangi bosqichga olib chiqish chora-tadbirlari yuzasidan 11-sentyabr kuni o‘tkazilgan videoselektor yig‘ilishida “Odamlarga qancha yordam bermaylik, mahallalar sharoitini yaxshilamasak, kambag‘allik qisqarmaydi”, deb aytgandi.
Shu bois 2025-yilda mahallalar infratuzilmasini rivojlantirishga barcha manbalardan 1,6 milliard dollar ajratiladi. Bu mablag‘larning 1,2 trillion so‘mi, avvalo, eng og‘ir 300 ta mahallada suv nasoslari va quyosh panellari o‘rnatishga beriladi. Yana 2 trillion so‘m hisobidan eng og‘ir 500 ta mahallada elektr, yo‘l, internet va boshqa infratuzilma masalalari hal etiladi.
Izoh (0)